တရုတ်-မြန်မာစီးပွားရေးစင်္ကြံ

တရုတ်-မြန်မာစီးပွားရေးစင်္ကြံသည် တရုတ်သမ္မတ ရှီကျင့်ဖျင်က၂၀၁၃ ခုနှစ်တွင် ကြေညာခဲ့သည့် ရည်မှန်းချက်ကြီးမားပြီး မဟာဗျူဟာကျသော ခါးပတ်တစ်ကွင်းလမ်းတစ်စင်း(BRI) အစီအမံ၏ အစိတ်အပိုင်းဖြစ်သည်။

ခါးပတ်တစ်ကွင်းလမ်းတစ်စင်း အစီအမံမှာ စီးပွားရေး၊ ရင်းနှီးမြုပ်နှံမှုနှင့်သက်ဆိုင်သော အခြေခံအဆောက်အအုံများ၊ စက်မှုဇုန်ကြီးများ၊ လမ်းမများ၊ မီးရထားလမ်းများ၊ ရေနက်ဆိပ်ကမ်းများကို တည်ဆောက်ပြီး ရေလမ်း၊ ကုန်လမ်းများဖြင့်ချိတ်ဆက်ကာ နိုင်ငံပေါင်း  ၇၀ နီးပါး ပါဝင်လာရန် ရည်မှန်းထားသည်။

ထိုခါးပတ်တစ်ကွင်းလမ်းတစ်စင်းအစီအမံမှာ တရုတ်နိုင်ငံမှ ဥရောပတိုက်အထိ အာရှအလယ်ပိုင်း၊ အရှေ့အလယ်ပိုင်းဒေသနှင့် ရှရှားတို့အား ဖြတ်သန်းပြီး ကုန်စည်စီးဆင်းမှုနှင့် ရင်းနှီးမြုပ်နှံမှုများကို ချိတ်ဆက်တိုးမြှင့်ရန် ဖြစ်သည်။ တပြိုင်နက်ထဲမှာပင် ဒေသတွင်းတွင် တရုတ်နိုင်ငံ၏ သြဇာလွှမ်းမိုးမှုကို တည်ဆောက်ရန် ဦးစားပေးသော အစီအမံဖြစ်သည်။

အင်္ဂလိပ်အက္ခရာ “ဝိုင်”(Y) ပုံသဏ္ဌာန်ရှိပြီး စုစုပေါင်း ကီလိုမီတာ ၁၇၀၀ နီးပါး(မိုင်တစ်ထောင်ကျော်) ရှည်လျားမည့် တရုတ်-မြန်မာစီးပွားရေးစင်္ကြံသည် တရုတ်ပြည်သူသမ္မတနိုင်ငံ၊ ယူနန်ပြည်နယ်ရှိ ကူမင်းနှင့် မြန်မာနိုင်ငံရှိ စီးပွားရေးအရ အချက်အခြာကျသော မူဆယ်၊ မန္တလေး၊ ရန်ကုန်နှင့် ကျောက်ဖြူမြို့တို့ကို ချိတ်ဆက်ဖြတ်သန်းသွားမည် ဖြစ်သည်။ စီးပွားရေးစင်္ကြံလမ်းမတလျောက်တွင် အထူးစီးပွားရေးဇုန်များ၊ ဆိပ်ကမ်းများ၊ အဆင့်မြင့်နယ်စပ်ဂိတ်များ၊ ကုန်လှောင်ရုံများ၊ ကုန်စည်ထုတ်လုပ်နိုင်မည့် စက်မှုဇုန်များ စသည့် ကုန်လမ်းကြောင်းရော၊ ရေလမ်းကြောင်းပါ နှစ်ခုစလုံးကိုအသုံးပြုပြီး ကုန်စည်ကူးသန်းနိုင်မည့် လမ်းကြောင်းများဖြစ်ပေါ်လာစေရေးအတွက် အကောင်အထည်ဖော်သွားမည့်စီမံကိန်းများလည်း ပါဝင်သည်။

တရုတ်-မြန်မာစီးပွားရေးစင်္ကြံသည် တရုတ်နိုင်ငံ၏ စီးပွားရေးအရ ဖွံ့ဖြိုးမှုနောက်ကျနေသော အနောက်ပိုင်းပြည်နယ်များတွင် စီးပွားရေးဖွံ့ဖြိုးလာရေးအတွက် ရည်ရွယ်သည်။ ထို့အပြင်  စီးပွားရေးစင်္ကြံ တွင်ပါဝင်သော ကျောက်ဖြူရေနက်ဆိပ်ကမ်းနှင့် အထူးစီးပွားရေးဇုန်သည် တရုတ်နိုင်ငံကို အိန္ဒိယသမုဒ္ဒရာသို့ ထွက်ပေါက်ပေးမည့် ဒေသတွင်းမဟာဗျူဟာကျသည့် စီမံကိန်းတစ်ခုလည်း ဖြစ်သည်။  

နောက်ခံနှင့် စီမံကိန်းဖြစ်စဉ်

တရုတ်-မြန်မာစီးပွားရေးစင်္ကြံ စီမံကိန်းအမည်ကို ၂၀၁၇ ခုနှစ်၊ နိုဝင်ဘာလတွင် တရုတ်နိုင်ငံခြားရေးဝန်ကြီး ဝမ်ယိက နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကို နေပြည်တော်တွင် လာရောက်တွေ့ ဆုံချိန်အတွင်း တရားဝင်အဆိုပြုခဲ့သည်။

မြန်မာနိုင်ငံတွင် တရုတ်နိုင်ငံခြားရေးဝန်ကြီး ဝမ်ယိ၏ မူလအစီအစဉ်မှာ ရခိုင်ပြည်နယ်အတွင်း ဖြစ်ပွားနေသော ပဋိပက္ခများကြောင့် နေရပ်စွန့်ခွာသွားသောသူများအတွက် ဘင်္ဂလားဒေ့ရှ်နိုင်ငံနှင့် ညှိနိူင်းရာတွင် ကြားဝင်စေ့စပ်ပေးရန်ဖြစ်သည်။

ဒေါ်အောင်ဆန်းစုကြည်သည် ၂၀၁၇ ခုနှစ် အစောပိုင်း၊ မေလ ၁၄ ရက်နှင့် ၁၅ ရက်များတွင် တရုတ်နိုင်ငံ၊ ဘေဂျင်း၌ ကျင်းပသော နိုင်ငံတကာခါးပတ်တစ်ကွင်းလမ်းတစ်စင်းအစီအမံ ပူးပေါင်းဆောင်ရွက်ရေးဖိုရမ်သို့လည်း တတ်ရောက်ခဲ့သည်။ ထိုခရီးစဉ်အတွင်း တရုတ်သမ္မတရှီကျင့်ဖျင်နှင့် သီးသန့်တွေ့ဆုံပြီး ခါးပတ်တစ်ကွင်းလမ်းတစ်စင်းအစီအမံတွင် မြန်မာနိုင်ငံက ပါဝင်ရေး ဆွေးနွေးခဲ့သည်။

တရုတ်ဝန်ကြီးချုပ်နှင့်လည်း ဒေါ်အောင်ဆန်းစုကြည်သည် သီးသန့်တွေ့ဆုံခဲ့သည်။ ယင်းနောက်တွင် နှစ်နိုင်ငံအကြား နားလည်မှုစာချွန်လွှာငါးခုကို လက်မှတ်ရေးထိုးခဲ့သည်။ ထိုနားလည်မှုစာချွန်လွှာတို့တွင် တရုတ်-မြန်မာစီးပွားရေးစင်္ကြစီမံကိန်း၏ အစိတ်အပိုင်းဖြစ်လာမည့် စာချွန်လွှာနှစ်ခု ပါဝင်သည်။ တရုတ်-မြန်မာ နှစ်နိုင်ငံကြားတွင် နယ်စပ်စီးပွားရေးပူးပေါင်းရေးဇုန်များ တည်ဆောက်ရေးနှင့်  ခါးပတ်တစ်ကွင်းလမ်းတစ်စင်းအစီအမံ မူဘောင်သဘောတူညီမှုတွင် ပူးပေါင်းပါဝင်ရေး နားလည်မှုစာချွန်လွှာတို့ ဖြစ်သည်။

ဝမ်ယိက တရုတ်-မြန်မာစီးပွားရေးစင်္ကြံကို တရားဝင်မိတ်ဆက်ပေးပြီးသည့်နောက်တွင် နှစ်နိုင်ငံအကြား တရားဝင်ဆွေးနွေးမှုများကို ပြုလုပ်ခဲ့သည်။ တရုတ်-မြန်မာစီးပွားရေးစင်္ကြံ နားလည်မှုစာချွန်လွှာကို ၂၀၁၈ ခုနှစ်၊ ဖေဖော်ဝါရီလ ၆ ရက်နေ့တွင် နောက်ဆုံးအကြိမ်အဖြစ် ဆွေးနွေးအချောသတ်ခဲ့သည်။

ဆွေးနွေးမှုများတွင် မြန်မာဘက်က ဦးဆောင်သူမှာ ထိုအချိန်က စီမံကိန်းနှင့်ဘဏ္ဍာရေးဝန်ကြီးလည်းဖြစ်၊ မြန်မာနိုင်ငံ၏ရင်းနှီးမြုပ်နှံမှုကော်မရှင်၏ ဥက္ကဋ္ဌလည်းဖြစ်သူ ဦးကျော်ဝင်းဖြစ်ပြီး တရုတ်နိုင်ငံဘက်က ဦးဆောင်သူမှာ တရုတ်အမျိုးသားဖွံ့ဖြိုးရေးနှင့် ပြုပြင်ပြောင်းလဲရေးကော်မရှင်၏ ဒုတိယဥက္ကဋ္ဌ နင်ကျိဇယ်(Ning Jizhe) ဖြစ်သည်။

အစိုးရ၏တရားဝင်မှတ်တမ်းအရ နားလည်မှုစာချွန်လွှာကို အချောသတ်ပြီးနောက်တွင် စီးပွားရေးစင်္ကြံအောက်ရှိ ဦးစားပေးစီမံကိန်းများနှင့်ပတ်သက်သည့် အသေးစိတ်ကိစ္စကို သက်ဆိုင်ရာဝန်ကြီးဌာနများက စတင်ဆွေးနွေးခဲ့ကြသည်။

၂၀၁၈ ခုနှစ်၊ မေလ ၁၀ ရက်နေ့တွင် သမ္မတ၏သဘောတူညီချက်အပါအဝင် စီးပွားရေးစင်္ကြံတွင် ပါဝင်ပတ်သတ်မည့် ပြည်ထောင်စုဝန်ကြီးဌာနများမှ ဝန်ကြီးများ၏သဘောတူညီချက်များဖြင့် နားလည်မှုစာချွန်လွှာကို မြန်မာဘက်ကအတည်ပြုခဲ့သည်။

၂၀၁၈ ခုနှစ်၊ မေလ ၁၄ ရက်နေ့တွင် နေပြည်တော်ရှိ စီမံကိန်းနှင့်ဘဏ္ဍာရေးဝန်ကြီးဌာနတွင် နှစ်နိုင်ငံတို့မှ ညွှန်ကြားရေးမှူးချုပ်အဆင့်ရှိ အစိုးရအရာရှိများပါဝင်သော အလုပ်အဖွဲ့က တရုတ်-မြန်မာစီးပွားရေးစင်္ကြံ အကောင်အထည်ဖော်ရေးအစည်းအဝေးကို စတင်ဆွေးနွေးခဲ့သည်။ ထိုအစည်းအဝေးတွင် နှစ်နိုင်ငံအကြား ပူးတွဲကော်မတီဖွဲ့စည်းရေးနှင့် အလုပ်အဖွဲ့များ ဖွဲ့စည်းရေးကို တင်ပြကြသည်။

၂၀၁၈ ခုနှစ်၊ ဇွန်လ ၁၄ ရက်နေ့တွင် နှစ်နိုင်ငံအကြား အလုပ်အဖွဲ့၏ ဒုတိယအကြိမ်အစည်းအဝေးကို ကူမင်းမြို့တွင် ကျင်းပခဲ့သည်။ နားလည်မှုစာချွန်လွှာတွင် လက်မှတ်ရေးထိုးရေးနှင့် ဦးစားပေးစီမံကိန်းများ အကောင်အထည်ဖော်ရေးကို ထိုအစည်းအဝေး၌ အသေးစိတ်ဆွေးနွေးခဲ့သည်။

၂၀၁၈ ခုနှစ်၊ စက်တင်ဘာလတွင် စီမံကိန်းနှင့်ဘဏ္ဍာရေးဝန်ကြီး ဦးစိုးဝင်းနှင့် တရုတ်အမျိုးသားဖွံ့ဖြိုးရေးနှင့်ပြုပြင်ပြောင်းလဲရေးကော်မရှင်၏ ဥက္ကဋ္ဌ ဟီလဖန်(He Lifeng) တို့  ဘေဂျင်းတွင် တွေ့ဆုံပြီး တရုတ်-မြန်မာစီးပွားရေးစင်္ကြံ အကောင်အထည်ဖော်ရေး နားလည်မှု စာချွန်လွှာကို လတ်မှတ်ရေးထိုးခဲ့သည်။

ထိုနားလည်မှုစာချွန်လွှာတွင် အချက် ၁၅ ချက် ပါဝင်ပြီး စီးပွားရေးစင်္ကြံတလျောက်တွင် အခြေခံအဆောက်အအုံများ တည်ဆောက်ရေး၊ စက်မှုဇုန်များတည်ဆောက်ရေး၊ ကုန်သွယ်ရေးကဏ္ဍ၊ သယ်ယူပို့ဆောင်ရေးကဏ္ဍ၊ စွမ်းအင်ကဏ္ဍ၊ စိုက်ပျိုးရေးကဏ္ဍ၊ ငွေကြေးကဏ္ဍ၊ ခရီးသွားကဏ္ဍ၊ သဘာဝပတ်ဝန်းကျင်ထိန်းသိမ်းရေးကဏ္ဍ၊ သိပ္ပံနှင့် နည်းပညာကဏ္ဍ၊ လူ့စွမ်းအားအရင်းအမြစ်များ ဖွံ့ဖြိုးရေး၊ ဝန်ထမ်းများအရည်အသွေးမြှင့်တင့်ရန်အတွက် သင်တန်းများပေးရေး၊ ရေအရင်းအမြစ်ထိန်းသိမ်းရေး၊ ရေဘေးအန္တရာယ်များထိန်းချုပ်ရေး၊ သဘာဝဘေးအန္တရာယ်များကာကွယ်ရေး၊ ပြည်နယ်များရှိ ဒေသခံများနှင့် ပူးပေါင်းဆောင်ရွက်မှု မြှင့်တင့်ရေး၊ ရင်းနှီးမြုပ်နှံမှုများ ပိုမိုတိုးမြှင့်ရေးနှင့် ဒီဂျစ်တယ်ပိုးသားလမ်းမ အကောင်အထည်ဖော်ရေး စသည်တို့တွင် ပူးပေါင်းဆောင်ရွက်ရန်ဖြစ်သည်။

လက်ရှိအချိန်ထိ မြန်မာအစိုးရသည် နားလည်မှုစာချွန်လွှာတွင်ပါဝင်သော အသေးစိတ်အချက်အလက်များ၊ သဘောတူညီချက်ကို တရားဝင်ထုတ်ဖော် ကြေညာထားခြင်းမရှိပေ။ ထို့အပြင် စီးပွားရေးစင်္ကြအောက်ရှိ ဦးစားပေးစီမံကိန်းများကို တရားဝင်ထုတ်ဖော်ခြင်းမရှိခဲ့ပါ။ ၎င်းတို့အနက် စီမံကိန်းသုံးခုကိုသာ သက်ဆိုင်ရာဝန်ကြီးဌာနများ၏ ထုတ်ပြန်ချက်ကြောင့် စီးပွားရေးစင်္ကြံအောက်ရှိ စီမံကိန်းများအဖြစ် သိရှိရသည်။ ၎င်းတို့မှာ ကျောက်ဖြူရေနက်ဆိပ်ကမ်းနှင့် အထူးစီးပွားရေးဇုန်စီမံကိန်း၊ မူဆယ်-မန္တလေးရထားလမ်းစီမံကိန်းနှင့် တရုတ်-မြန်မာ နှစ်နိုင်ငံနယ်စပ် စီးပွားရေးပူးပေါင်း ဆောင်ရွက်မှုဇုန်များ တည်ဆောက်ရေးတို့ ဖြစ်သည်။

စီးပွားရေးစင်္ကြံ နားလည်မှုစာချွန်လွှာတွင် လက်မှတ်ရေးထိုးပြီး တစ်လအကြာ၊ အောက်တိုဘာလတွင် မူဆယ်-မန္တလေး ရထားလမ်းစီမံကိန်းအတွက် ဖြစ်တန်ချေဆန်းစစ်ခြင်းပြုလုပ်ရန် နားလည်မှုစာချွန်လွှာကို လက်မှတ်ရေးထိုးခဲ့သည်။

ပိုင်ဆိုင်မှုရာခိုင်နှုန်းခွဲဝေမှုကြောင့် ကာလကြာရှည်ကြန့်ကြာနေသော ကျောက်ဖြူရေနက်ဆိပ်ကမ်းနှင့် အထူးစီးပွားရေးဇုန်စီမံကိန်းအတွက် မူဘောင်သဘောတူညီချက်ကို ၂၀၁၈ ခုနှစ်၊ နိုဝင်ဘာလတွင် လက်မှတ်ရေးထိုးခဲ့သည်။

၂၀၁၉ ခုနှစ်၊ ဧပြီလက ဘေဂျင်းတွင်ကျင်းပသော ဒုတိယအကြိမ်မြောက် ခါးပတ်တစ်ကွင်းလမ်းတစ်စင်း ဖိုရမ်တွင် တရုတ်-မြန်မာစီးပွားရေးစင်္ကြံ ပူးပေါင်းဆောင်ရွက်ရေးအစီအစဉ်(၂၀၁၉ -၂၀၃၀) နားလည်မှုစာချွန်လွှာကို လက်မှတ်ရေးထိုးခဲ့သည်။ ထို့အပြင် မူဆယ်-မန္တလေး ရထားလမ်း ဖြစ်နိုင်ချေ ဆန်းစစ်ချက်အစီရင်ခံစာနှင့်  ကနဦး ဦးစားပေးစီမံကိန်းများစာရင်းကိုလည်း တရုတ်နိုင်ငံက မြန်မာနိုင်ငံကို လွှဲပြောင်းပေးခဲ့သည်။

စီးပွားရေးစင်္ကြံ ခေါင်းစဉ်အောက်တွင် စီမံကိန်း ၃၈ ခုဝန်းကျင်ကို တရုတ်နိုင်ငံက တင်ပြထားကြောင်း ၂၀၁၉ ခုနှစ်၊ မေလတွင်ကျင်းပသော သတင်းစာရှင်းလင်းပွဲတွင် စီမံကိန်းနှင့်ဘဏ္ဍာရေးဝန်ကြီးဌာန အမြဲတမ်းအတွင်းဝန်က ထုတ်ဖော်ပြောဆိုခဲ့သည်။

မြန်မာအစိုးရ၏ အဓိက ရည်မှန်းချက်

မြန်မာအစိုးရဝန်ကြီးဌာနများတွင် One Belt and One Road Initiative ကို တရားဝင် သတ်မှတ်ထားသောနာမည်မှာ “ရပ်ဝန်းတစ်ခု၊ လမ်းကြောင်းတစ်ခုအစီအမံ” ဖြစ်သည်။

အမျိုးသားဒီမိုကရေစီအဖွဲ့ချုပ်ဦးဆောင်သောအစိုးရအနေနှင့် တရုတ်-မြန်မာ စီးပွားရေးစင်္ကြအပေါ် အာရုံစိုက်ရခြင်း၏ အဓိကရည်ရွယ်ချက်မှာ ပဋိပက္ခများဖြစ်ပွားနေသော မြန်မာနိုင်ငံမြောက်ပိုင်းနှင့် အရှေ့မြောက်ဘက်ဒေသများတွင် ရေရှည်ဖွံ့ဖြိုးတိုးတတ်သော ငြိမ်းချမ်းရေးနှင့် တည်ငြိမ်မှုကို ဖန်တီးပေးရန်ဖြစ်သည်။ စီမံကိန်းများကို အခြေတည်စဉ်းစားရာတွင်  ၎င်းတို့ထုတ်ပြန်ထားသော အမျိုးသားရေရှည်ဖွံ့ဖြိုးတိုးတတ်ရေးအစီအမံနှင့် ကိုက်ညီမှုရှိသော စီမံကိန်းများကို ဦးစားပေးရေးဖြစ်သည်။ ယင်းအချက်ကိုလည်း အစိုးရဌာနဆိုင်ရာအဖွဲ့အစည်းများသည် တရားဝင်ထုတ်ဖော်ရေးသား၊ ပြောဆိုလေ့ရှိသည်။

စီးပွားရေးစင်္ကြံတွင် နှစ်နိုင်ငံကိုယ်စားပြု၍ ပါဝင်သူများ

တရုတ်-မြန်မာစီးပွားရေးစင်္ကြံအတွက် နှစ်နိုင်ငံတာဝန်ရှိသူများပါဝင်သည့် ဦးဆောင်ညှိနိူင်းရေးကော်မတီ(Leading Coordination Agency)ကို မြန်မာဘက်မှ စီမံကိန်းနှင့်ဘဏ္ဍာရေးဝန်ကြီးဌာနနှင့် တရုတ်ဘက်မှ အမျိုးသားဖွံ့ဖြိုးရေးနှင့်ပြုပြင်ပြောင်းလဲရေးကော်မရှင် တို့နှင့် ဖွဲ့စည်းထားသည်။

၎င်းတို့တာဝန်မှာ စီးပွားရေးစင်္ကြံအကောင်အထည်ဖော်ရေးအတွက် မူဝါဒများချမှတ်ခြင်း၊ ဝန်ကြီးဌာနများမှ တင်ပြလာသော ဦးစားပေးစီမံကိန်းများကို နိုင်ငံတော်မူဝါဒများနှင့်အညီ အတည်ပြုပေးခြင်း၊ 

နှစ်ဦးနှစ်ဖက်တင်ပြလိုသောစီမံကိန်းများရှိပါက ညှိနိူင်းတင်ပြပေးခြင်း၊ စီးပွားရေးစင်္ကြံ အကောင်အထည်ဖော်ရေးတွက် တွန်းအားပေးရန်၊ ဖြစ်ပေါ်လာသည့်ကိစ္စရပ်များကို နှစ်နိုင်ငံကိုယ်စားပြု၍ ဆွေးနွေးညှိနိူင်းပေးရန်တို့ ဖြစ်သည်။

ထို့အပြင် စီးပွားရေးစင်္ကြံ၏ အထွေထွေအတွင်းရေးမှူးဌာန(The Secretariat)ကို မြန်မာနိုင်ငံဘက်မှ စီမံကိန်းနှင့်ဘဏ္ဍာရေးဝန်ကြီးဌာန၏ဌာနခွဲဖြစ်သော ရင်းနှီးမြုပ်နှံမှုကော်မရှင်ရုံးနှင့် တရုတ်နိုင်ငံဘက်မှ အမျိုးသားဖွံ့ဖြိုးရေးနှင့်ပြုပြင်ပြောင်းလဲရေးကော်မရှင်၏ ဌာနခွဲဖြစ်သော Department of Foreign Capital and Overseas Investment ဌာနတို့ဖြင့်ဖွဲ့စည်းထားသည်။

စီးပွားရေးစင်္ကြံ၏ အထွေထွေအတွင်းရေးမှုးဌာန၏တာဝန်မှာ နှစ်နိုင်ငံဝန်ကြီးများအဆင့် အစည်းအဝေးများကို နှစ်စဉ်ကျင်းပနိုင်ရန် စီမံပေးခြင်းဖြစ်သည်။

နှစ်နိုင်ငံအကြား စီးပွားရေးစင်္ကြံအောက်ရှိ စီမံကိန်းများကို အသေးစိတ်ဆွေးနွေးရန်အတွက် ပူးပေါင်းဆောင်ရွက်ရေးအလုပ်အဖွဲ့(Cooperation Working Groups) ၁၂ ခု  ကိုလည်း ဖွဲ့စည်းထားသည်။

မြန်မာနိုင်ငံဘက်မှ ကော်မတီများ

စီးပွားရေးစင်္ကြံအကောင်အထည်ဖော်ရေးအတွက် အဓိကကော်မတီငါးခုကို မြန်မာဘက်တွင် ဖွဲ့စည်းခဲ့သည်။ ၎င်းကော်မတီများသည် စီးပွားရေးစင်္ကြံအောက်တွင်အကောင်အထည်ဖော်မည့်စီမံကိန်းများအတွက် မူဝါဒများချမှတ်ခြင်း၊ လုပ်ငန်းများဆောက်ရွက်ခြင်း၊ စီမံကိန်းများအကောင်အထည်ဖော်ခြင်း၊ ဆန်းစစ်လေ့လာခြင်းနှင့် နားလည်မှုစာချွန်လွှာတွင်ပါဝင်သောအချက်များကို ထိထိရောက်ရောက် အကောင်အထည်ဖော်ခြင်းတို့ကို တာဝန်ခွဲဝေယူထားသည်။

၁။ ရပ်ဝန်းတစ်ခုလမ်းကြောင်းတစ်ခုဦးဆောင်ကော်မတီ

 “ရပ်ဝန်းတစ်ခုလမ်းကြောင်းတစ်ခုနှင့်စပ်လျဉ်းသည့် အကောင်အထည်ဖော်ဆောင်ရွက်ရေး ဦးဆောင်ကော်မတီ” ကို ၂၀၁၈ ခုနှစ်၊ စက်တင်ဘာလ ၁၁ ရက်နေ့တွင် ဖွဲ့စည်းခဲ့သည်။

ထိုဦးဆောင်ကော်မတီမှာ မြန်မာ-တရုတ်စီးပွားရေးစင်္ကြံနှင့် မြန်မာ-တရုတ်နယ်စပ်စီးပွားရေး ပူးပေါင်းဆောင်ရွက်မှုဇုန် တည်ထောင်ရေးနှင့်ပတ်သက်၍ ပြည်ထောင်စုဝန်ကြီးဌာနများ၊ တိုင်းဒေသကြီးနှင့် ပြည်နယ်အစိုးရအဖွဲ့များအကြားတွင် လုပ်ငန်းတာဝန်များကို ကဏ္ဍအလိုက် ပူးပေါင်းဆောင်ရွက်နိုင်ရေး၊ စီမံကိန်းအကောင်အထည်ဖော်ခြင်း၊ ဆန်းစစ်လေ့လာသုံးသပ်ခြင်း၊ မူဝါဒချမှတ်ခြင်းများကို ပိုမိုထိရောက်စွာ အကောင်အထည်ဖော်နိုင်ရေးတို့အတွက် ဖြစ်သည်။ ကော်မတီဖွဲ့စည်းကြောင်းကြေညာချက်ကို နိုင်ငံတော်သမ္မတဦးဝင်းမြင့်က လက်မှတ်ရေးထိုးပြီးထုတ်ပြန်ခဲ့ခြင်းဖြစ်သည်။

ကော်မတီတွင် နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ဥက္ကဋ္ဌအဖြစ် တာဝန်ယူပြီး ဒုတိယသမ္မတ ၁ ဦးမြင့်ဆွေက ဒုတိယဥက္ကဋ္ဌအဖြစ် တာဝန်ယူသည်။ ပြည်ထောင်စုဝန်ကြီး ၁၈ ဦးက အဖွဲ့ဝင်များအဖြစ် ပါဝင်သည်။ ၎င်းဝန်ကြီးဌာနတို့မှာ  ပြည်ထဲရေးဝန်ကြီးဌာန၊ နယ်စပ်ရေးရာဝန်ကြီးဌာန၊ နိုင်ငံတော်အတိုင်ပင်ခံရုံးဝန်ကြီးဌာန၊ ပြည်ထောင်စုအစိုးရအဖွဲ့ရုံးဝန်ကြီးဌာန၊ သာသနာရေးနှင့်ယဉ်ကျေးမှုဝန်ကြီးဌာန၊ စိုက်ပျိုးရေးမွေးမြူရေးနှင့်ဆည်မြောင်းဝန်ကြီးဌာန၊ ပို့ဆောင်ရေးနှင့်ဆက်သွယ်ရေးဝန်ကြီးဌာန၊ သယံဇာတနှင့်သဘာဝပတ်ဝန်းကျင်ထိန်းသိမ်းရေးဝန်ကြီးဌာန၊ လျှပ်စစ်နှင့်စွမ်းအင်ဝန်ကြီးဌာန၊ အလုပ်သမားလူဝင်မှုကြီးကြပ်ရေးနှင့်ပြည်သူ့အင်အားဝန်ကြီးဌာန၊ စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ ပညာရေးဝန်ကြီးဌာန၊ ကျန်းမာရေးနှင့်အားကစားဝန်ကြီးဌာန၊ စီမံကိန်းနှင့်ဘဏ္ဍာရေးဝန်ကြီးဌာန(ယခု စီမံကိန်း၊ ဘဏ္ဍာရေးနှင့် စက်မှုဝန်ကြီးဌာန)၊ ဆောက်လုပ်ရေးဝန်ကြီးဌာန၊ လူမူဝန်ထမ်း၊ ကယ်ဆယ်ရေးနှင့်ပြန်လည်နေရာချထားရေးဝန်ကြီးဌာန၊ ဟိုတယ်နှင့်ခရီးသွားလာရေးဝန်ကြီးဌာနနှင့် အပြည်ပြည်ဆိုင်ရာ ပူးပေါင်းဆောင်ရွက်ရေးဝန်ကြီးဌာနတို့ ဖြစ်သည်။

ဦးဆောင်ကော်မတီတွင် စီးပွားရေးစင်္ကြံဖြတ်သန်းသွားမည့် ပြည်နယ်နှင့် တိုင်းများဖြစ်သော ကချင်ပြည်နယ်၊ မန္တလေးတိုင်းဒေသကြီး၊ ရခိုင်ပြည်နယ်၊ ရန်ကုန်တိုင်းဒေသကြီးနှင့် ရှမ်းပြည်နယ်တို့၏ ဝန်ကြီးချုပ်ငါးဦးကိုလည်း အဖွဲ့ဝင်အဖြစ် ထည့်သွင်းထားသည်။ ထို့အပြင် နေပြည်တော်ကောင်စီဥက္ကဋ္ဌကိုလည်း အဖွဲ့ဝင်အဖြစ် ထည့်သွင်းထားပြီး နိုင်ငံခြားရေးဝန်ကြီးဌာနမှ အမြဲတမ်းအတွင်းဝန်က အတွင်းရေးမှူးအဖြစ် တာဝန်ယူထားသည်။

ဦးဆောင်ကော်မတီ၏ ပထမအကြိမ်အစည်းအဝေးကို၂၀၁၉ ခုနှစ်၊ ဖေဖော်ဝါရီလ ၁၈ ရက်နေ့တွင် ကျင်းပခဲ့သည်။

ဦးဆောင်ကော်မတီ၏ လုပ်ငန်းတာဝန်များ

ဦးဆောင်ကော်မတီတွင် လုပ်ငန်းတာဝန်များ သတ်မှတ်ထားသည်။

၁။ မြန်မာနိုင်ငံနှင့် တရုတ်နိုင်ငံတို့အကြား ‘ရပ်ဝန်းတစ်ခုလမ်းကြောင်းတစ်ခု’ ခေါင်းစဉ်အောက်မှ ပူးပေါင်းဆောင်ရွက်မှုများ ပြုလုပ်ရာတွင် ဝန်ကြီးဌာနများ၊ အစိုးရဌာနအဖွဲ့အစည်းများ၊ တိုင်းဒေသကြီးနှင့် ပြည်နယ်အစိုးရအဖွဲ့များနှင့် ညှိနိူင်းဆောင်ရွက်ရန် လမ်းညွှန်မှုများပေးခြင်း၊

၂။ ‘ရပ်ဝန်းတစ်ခုလမ်းကြောင်းတစ်ခု’ နှင့်သက်ဆိုင်သည့် ပူးပေါင်းဆောင်ရွက်မှုများ ပြုလုပ်ရာတွင် မူဝါဒနှင့်သက်ဆိုင်သောလမ်းညွှန်မှုများ ပေးခြင်း၊

၃။ စီမံကိန်းများဆောင်ရွက်ရာတွင် မူဝါဒနှင့် လုပ်ထုံးလုပ်နည်းများ၊ စီမံခန့်ခွဲမှုနည်းလမ်းများကို ရေးဆွဲပြီး ပြည်ထောင်စုအစိုးရအဖွဲ့သို့ တင်ပြ၍ အတည်ပြုချက်ရယူခြင်း၊

၄။ ’ရပ်ဝန်းတစ်ခုလမ်းကြောင်းတစ်ခု’ နှင့်စပ်လျဉ်း၍ သုတေသနပြုလေ့လာနိုင်ရေးအတွက် ကျွမ်းကျင် ပညာရှင်များအဖွဲ့ကို ဖွဲ့စည်းတာဝန်ပေးအပ်ခြင်း တို့ဖြစ်သည်။

၂။ တရုတ်–မြန်မာစီးပွားရေးစင်္ကြံ ပူးတွဲကော်မတီ

တရုတ်-မြန်မာစီးပွားရေးစင်္ကြံပူးတွဲတည်ထောင်ရေးဆိုင်ရာ နားလည်မှုစာချွန်လွှာကို ထိထိရောက်ရောက်အကောင်အထည်ဖော်ရေးအတွက် ပူးတွဲကော်မတီကို ၂၀၁၈ ခုနှစ်၊ စက်တင်ဘာလ ၁၁ ရက်နေ့တွင် စီမံကိန်းနှင့် ဘဏ္ဍာရေးဝန်ကြီးဌာန၊ ပြည်ထောင်စုဝန်ကြီးနှင့် ဝန်ကြီးဌာန ခြောက်ခုမှ ဒုတိယဝန်ကြီးများ၊ ဒုတိယရှေ့နေချုပ်၊ ဗဟိုဘဏ်ဒုတိယဥက္ကဋ္ဌ၊ ပြည်နယ်နှင့် တိုင်းဒေသကြီးများမှ စီမံကိန်းနှင့်ဘဏ္ဍာရေးဝန်ကြီး ငါးဦး၊ အမြဲတမ်းအတွင်းဝန် လေးဦး၊ ညွှန်ကြားရေးမှုးချုပ်တစ်ဦးတို့ဖြင့် ဖွဲ့စည်းခဲ့သည်။ ထိုကော်မတီဖွဲ့စည်းကြောင်းကြေညာချက်ကို ပြည်ထောင်စုအစိုးရအဖွဲ့ အတွင်းရေးမှုး ဦးဇော်သန်းသင်းက လက်မှတ်ထိုးထုတ်ပြန်ခဲ့ခြင်းဖြစ်သည်။

စီမံကိန်းနှင့်ဘဏ္ဍာရေးဝန်ကြီးဌာန(ယခု စီမံကိန်းဘဏ္ဍာရေးနှင့်စက်မှုဝန်ကြီးဌာန) ပြည်ထောင်စုဝန်ကြီးကို ဥက္ကဋ္ဌအဖြစ် တာဝန်ပေးထားသည်။ စိုက်ပျိုးရေးမွေးမြူရေးနှင့်ဆည်မြောင်းဝန်ကြီးဌာန၊ ပို့ဆောင်ရေးနှင့်ဆက်သွယ်ရေးဝန်ကြီးဌာန၊ လျှပ်စစ်နှင့်စွမ်းအင်ဝန်ကြီးဌာန၊ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စီမံကိန်းနှင့်ဘဏ္ဍာရေးဝန်ကြီးဌာန၊ ဆောက်လုပ်ရေးဝန်ကြီးဌာနများမှ ဒုတိယဝန်ကြီးများက အဖွဲ့ဝင်ဖြစ်သည်။

ထို့အပြင် ပြည်ထောင်စုရှေ့နေချုပ်ရုံး ဒုတိယရှေ့နေချုပ်နှင့် နေပြည်တော်ကောင်စီဝင်တို့က အဖွဲ့ဝင်အဖြစ် ပါဝင်နေပြီး နိုင်ငံခြားစီးပွားဆက်သွယ်ရေးဦးစီးဌာနမှ ညွှန်ကြားရေးမှုးချုပ်က အတွင်းရေးမှုးအဖြစ် တာဝန်ယူထားသည်။

မကွေးတိုင်းဒေသကြီး စီမံကိန်းဘဏ္ဍာရေးနှင့်စည်ပင်သာယာရေးဝန်ကြီးဌာနဝန်ကြီး၊ မန္တလေးတိုင်းဒေသကြီး စီမံကိန်းနှင့်ဘဏ္ဍာရေးဝန်ကြီးဌာနဝန်ကြီး၊ ရခိုင်ပြည်နယ် ဘဏ္ဍာရေးအခွန်စီမံကိန်းနှင့်စီးပွားရေးဝန်ကြီးဌာန ဝန်ကြီး၊ ရန်ကုန်တိုင်းဒေသကြီး စီမံကိန်းနှင့်ဘဏ္ဍာရေးဝန်ကြီးဌာနဝန်ကြီး၊ ရှမ်းပြည်နယ် စီမံကိန်းနှင့်စီးပွားရေးဝန်ကြီးဌာနဝန်ကြီး၊ မြန်မာနိုင်ငံဗဟိုဘဏ် ဒုတိယဥက္ကဋ္ဌ၊ နိုင်ငံခြားရေးဝန်ကြီးဌာန၊ သယံဇာတနှင့်သဘာဝပတ်ဝန်းကျင်ထိန်းသိမ်းရေးဝန်ကြီးဌာန၊ စက်မှုဝန်ကြီးဌာန နှင့် ဟိုတယ်နှင့်ခရီးသွားလာရေးဝန်ကြီးဌာနတို့၏ အမြဲတမ်းအတွင်းဝန်များကလည်း အဖွဲ့ဝင်များအဖြစ် တာဝန်ယူထားသည်။

ပူးတွဲကော်မတီ၏ အဓိကလုပ်ငန်းတာဝန်များ

တရုတ်-မြန်မာစီးပွားရေးစင်္ကြံပူးတွဲကော်မတီ၏ အဓိကလုပ်ဆောင်ချက် ခြောက်ချက်ရှိသည်။

၁။ နှစ်နိုင်ငံစီးပွားရေးဖွံ့ဖြိုးတိုးတတ်မှုဆိုင်ရာ စီမံကိန်းများကို အပြန်အလှန်၊ အကျိုးရှိရှိ ဆောင်ရွက်ခြင်း၊ အတွေ့အကြုံဖလှယ်ခြင်း၊ စီးပွားရေးစင်္ကြံဖွံ့ဖြိုးတိုးတတ်ရေးနှင့်သက်ဆိုင်သည့် အထွေထွေအလေ့အထနှင့် အဓိကကျသောကိစ္စရပ်များကို အဆိုပြုခြင်းနှင့် လေ့လာခြင်း၊ ပူးပေါင်းဆောင်ရွက်မှု လုပ်ငန်းအဖွဲ့များ ဖွဲ့စည်းခြင်းနှင့် ယင်းလုပ်ငန်းအဖွဲ့များ၏ လုပ်ငန်းတာဝန်များကို သတ်မှတ်ခြင်းနှင့် အထောက်အပံ့ပြုနိုင်သော မူဝါဒများကို  ပေါင်းစပ်ဆောင်ရွက်ခြင်းအားဖြင့် နားလည်မှုစာချွန်လွှာကို အပြည့်အဝအကောင်အထည်ဖော်ဆောင်ရွက်ခြင်း၊

၂။ စီးပွားရေးဆိုင်ရာ နယ်ပယ်အသီးသီးတွင် နှစ်နိုင်ငံအတွေ့အကြုံဖလှယ်မှုများနှင့် ပူးပေါင်းဆောင်ရွက်မှုကို မြှင့်တင်ခြင်း၊

၃။ အဓိကစီမံချက်များနှင့် လုပ်ငန်းကဏ္ဍများကို ဆုံးဖြတ်ခြင်း၊

၄။ ပိုမိုကောင်းမွန်သော ရင်းနှီးမြုပ်နှံမှုဝန်းကျင်ဖန်တီးရေးနှင့် လျင်မြန်ချောမွေ့စေရေးအတွက် စေ့စပ်ညှိနိူင်းခြင်းဖြင့် ပြသာနာရပ်များကို ဖြေရှင်းဆောင်ရွက်ခြင်း၊ နှစ်ဦးနှစ်ဖက် စံချိန်စံညွှန်းနှင့်အရည်အသွေးအသိမှတ်ပြုရေးနှင့် စွမ်းဆောင်ရည်မြှင့်တင်ရေးတို့ကို မြှင့်တင်ဆောင်ရွက်ခြင်း၊ ၅။ စီးပွားရေးစင်္ကြံ ဖွံ့ဖြိုးတိုးတတ်ရေးအတွက် နှစ်ဖက်စလုံးမှပြည်သူလူထုပါဝင်ရေးကို အားပေးဆောင်ရွက်ခြင်း၊

၆။ စီးပွားရေးစင်္ကြံဆိုင်ရာ လုပ်ငန်းတိုးတတ်မှုအခြေအနေကို နှစ်ဖက်စလုံးမှအစိုးရများသို့ အစီရင်ခံခြင်း တို့ဖြစ်သည်။

၃။ တရုတ်–မြန်မာစီးပွားရေးစင်္ကြံ ပူးပေါင်းဆောင်ရွက်မှုလုပ်ငန်းအဖွဲ့

တရုတ်-မြန်မာစီးပွားရေးစင်္ကြံ ပူးပေါင်းဆောင်ရွက်မှုလုပ်ငန်းအဖွဲ့သည် တရုတ်-မြန်မာစီးပွားရေးစင်္ကြံ ပူးတွဲကော်မတီအောက်တွင် ရှိသည်။ စုစုပေါင်းလုပ်ငန်းအဖွဲ့၁၂ ဖွဲ့ ရှိသည်။ ထိုလုပ်ငန်းအဖွဲ့ကို ၂၀၁၉ ခုနှစ်၊ ဇန်နဝါရီလ ၂၅ ရက်နေ့တွင် တရုတ်-မြန်မာစီးပွားရေးစင်္ကြံ ပူးတွဲကော်မတီဥက္ကဋ္ဌ  ဦးစိုးဝင်းက လက်မှတ်ထိုး၍ ဖွဲ့စည်းခဲ့ခြင်းဖြစ်သည်။

ပူးပေါင်းဆောင်ရွက်မှုလုပ်ငန်းအဖွဲ့တွင် စီမံကိန်းနှင့်ဘဏ္ဍာရေးဝန်ကြီးဌာန(ယခု စီမံကိန်းဘဏ္ဍာရေးနှင့်စက်မှုဝန်ကြီးဌာ)၊ စက်မှုဝန်ကြီးဌာန(ယခု စီမံကိန်းဘဏ္ဍာရေးနှင့်စက်မှုဝန်ကြီးဌာန)၊ ပို့ဆောင်ရေးနှင့်ဆက်သွယ်ရေးဝန်ကြီးဌာန၊  လျှပ်စစ်နှင့်စွမ်းအင်ဝန်ကြီးဌာန၊ စိုက်ပျိုးရေး၊ မွေးမြူရေးနှင့်ဆည်မြောင်းဝန်ကြီးဌာန၊ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ပို့ဆောင်ရေးနှင့်ဆက်သွယ်ရေးဝန်ကြီးဌာန၊ ဟိုတယ်နှင့်ခရီးသွားလာရေးဝန်ကြီးဌာနနှင့် ပြန်ကြားရေးဝန်ကြီးဌာနတို့မှ အရာရှိများဖြင့် ဖွဲ့စည်းထားသည်။

၎င်း ၁၂ ဖွဲ့မှာ

၁။ ဖွံ့ဖြိုးတိုးတတ်မှုနှင့်စီမံကိန်းပူးပေါင်းဆောင်ရွက်မှုလုပ်ငန်းအဖွဲ့၊

၂။ ကုန်ထုတ်စွမ်းအားနှင့်ရင်းနှီးမြုပ်နှံမှုပူးပေါင်းဆောင်ရွက်မှုလုပ်ငန်းအဖွဲ့၊

၃။ သယ်ယူပို့ဆောင်ရေးပူးပေါင်းဆောင်ရွက်မှုလုပ်ငန်းအဖွဲ့၊

၄။ စွမ်းအင်ပူးပေါင်းဆောင်ရွက်မှုလုပ်ငန်းအဖွဲ့၊

၅။ စိုက်ပျိုးပူးပေါင်းဆောင်ရွက်မှုလုပ်ငန်းအဖွဲ့၊

၆။ နယ်စပ်စီးပွားရေးပူးပေါင်းဆောင်ရွက်မှုဇုန်များပူးပေါင်းဆောင်ရွက်ရေးအဖွဲ့၊

၇။ ဒီဂျစ်တယ်စီးပွားရေးဆိုင်ရာပူးပေါင်းဆောင်ရွက်မှုလုပ်ငန်းအဖွဲ့၊

၈။ ငွေကြေးဆိုင်ရာပူးပေါင်းဆောင်ရွက်မှုလုပ်ငန်းအဖွဲ့

၉။ ခရီးသွားလာရေးဆိုင်ရာပူးပေါင်းဆောင်ရွက်မှုလုပ်ငန်းအဖွဲ့၊

၁၀။ သတင်းအချက်အလက်ပူးပေါင်းဆောင်ရွက်မှုလုပ်ငန်းအဖွဲ့၊

၁၁။ ဒေသအဆင့်ပူးပေါင်းဆောင်ရွက်မှုလုပ်ငန်းအဖွဲ့

၁၂။ ဂေဟစနစ်ဆိုင်ရာသဘာဝပတ်ဝန်းကျင်ပူးပေါင်းဆောင်ရွက်မှုလုပ်ငန်းအဖွဲ့

တို့ဖြစ်သည်။

ပူးပေါင်းဆောင်ရွက်မှုလုပ်ငန်းအဖွဲ့ ၁၂ ဖွဲ့၏ လုပ်ငန်းတာဝန်များ

လုပ်ငန်းတာဝန်များမှာ အောက်ပါအတိုင်းဖြစ်သည်။

၁။ ဖွံ့ဖြိုးတိုးတတ်မှုစီမံကိန်းပူးပေါင်းဆောင်ရွက်အဖွဲ့၏ တာဝန်မှာ တရုတ်-မြန်မာစီးပွားရေးစင်္ကြံ ဖွံ့ဖြိုးတိုးတတ်ရေးအတွက် ရေရှည်စီမံကိန်း(Master Plan)ရေးဆွဲပြီး ပင်မစီမံကိန်းဘောင်အတွင်း၌ ကဏ္ဍအလိုက် စီမံကိန်းများကို ကာလအပိုင်းအခြားလိုက် ရေးဆွဲခြင်း၊ မြို့ပြအခြေခံဆောက်အအုံများ ဖော်ဆောင်ရာတွင် ပြုပြင်ပြောင်းလဲခြင်းနှင့် နှစ်နိုင်ငံစလုံးမှ မြို့တော်များနှင့် ခရိုင်များအကြား ခိုင်မာသောပူးပေါင်းဆောင်ရွက်မှုနှင့် အပြန်အလှန်သင်ယူမှုများ မြှင့်တင်ပေးခြင်းတို့ ဖြစ်သည်။

၂။ ကုန်ထုတ်စွမ်းအားနှင့်ရင်းနှီးမြုပ်နှံမှုပူးပေါင်းဆောင်ရွက်မှုလုပ်ငန်းအဖွဲ့၏ တာဝန်များမှာ စီမံကိန်းများ အကောင်အထည်ဖော်လုပ်ဆောင်နေစဉ်အတွင်း ဖြစ်ပေါ်လာသောပြသာနာများကို သက်ဆိုင်ရာဌာနများနှင့် ပူးပေါင်းဖြေရှင်းခြင်း၊ စင်္ကြံ၏ကျောရိုးမကြီးဖြစ်သည့် စီမံကိန်းများပြီးစီးရေးအတွက် မြှင့်တင်ဆောင်ရွက်ပေးခြင်း၊ ချည်မျှင်နှင့် ဆောက်လုပ်ရေးပစ္စည်း၊ အီလက်ထရောနစ်၊ မော်တော်ယဉ်၊ စက်ပစ္စည်း၊ ဓာတုအင်ဂျင်နီယာလုပ်ငန်း၊ သတ္တုဗေဒ၊ သတင်းအချက်အလက်ဆက်သွယ်ရေးနှင့် အသေးစားနှင့်အလတ်စားလုပ်ငန်းများ စသည့်ကဏ္ဍများတွင် ပူးပေါင်းဆောင်ရွက်ခြင်းတို့ ဖြစ်သည်။

၃။ သယ်ယူပို့ဆောင်ရေးပူးပေါင်းဆောင်ရွက်မှုလုပ်ငန်းအဖွဲ့၏ လုပ်ငန်းတာဝန်များမှာ ရွှေလီ-မန္တလေး- ကျောက်ဖြူ အဝေးပြေးလမ်းပိုင်းနှင့် မန္တလေး-နေပြည်တော်-ရန်ကုန် အဝေးပြေးလမ်းပိုင်းကို ဦးစားပေးဆောင်ရွက်ခြင်း၊ အဝေးပြေးလမ်းမ၊ ရေလမ်းကြောင်း၊ ဆိပ်ကမ်း၊ လေကြောင်းနှင့် စည်ပင်သာယာဆိုင်ရာ အခြေခံအဆောက်အအုံများတိုးတတ်ရေးကို ဆောင်ရွက်ခြင်း၊ ကျောက်ဖြူဆိပ်ကမ်း၊ ရွှေလီ-မန္တလေး-ကျောက်ဖြူရထားလမ်းပိုင်းနှင့် မန္တလေး-နေပြည်တော်-ရန်ကုန် ရထားလမ်းပိုင်း တိုးတတ်မှုရှိစေရေးဆောင်ရွက်ခြင်း၊ သင်္ဘောဖြင့် ကုန်စည်ပို့ဆောင်ခြင်းများ ဆောင်ရွက်ရန်တို့ ဖြစ်သည်။

၄။ စွမ်းအင်ပူးပေါင်းဆောင်ရွက်မှုလုပ်ငန်းအဖွဲ့၏ လုပ်ငန်းတာဝန်များမှာ လျှပ်စစ်ဓာတ်အား၊  လျှပ်စစ် ကွန်ရက်၊ ရေနံနှင့် သဘာဝဓာတ်ငွေ့ဆိုင်ရာပူးပေါင်းဆောင်ရွက်ခြင်း၊ တရုတ်-မြန်မာ လျှပ်စစ်ဓာတ်အားစနစ် အပြန်အလှန်ချိတ်ဆက်ဆောင်ရွက်ဆောင်ရွက်ရေးစီမံချက်ကို အကောင်အထည်ဖော်ဆောင်ရွက်ခြင်း၊ တရုတ်-မြန်မာ လျှပ်စစ်ဓာတ်အားပူးပေါင်းဆောင်ရွက်ရေးကော်မတီအပေါ် အခြေပြုလျက် စင်္ကြံနှင့်ဆက်နွယ်သောလုပ်ငန်းကဏ္ဍများနှင့်သက်ဆိုင်သည့် စွမ်းအင်ကိစ္စရပ်များတွင် ပူးပေါင်းဆောင်ရွက်ခြင်းတို့ ဖြစ်သည်။

၅။ စိုက်ပျိုးရေးပူးပေါင်းဆောင်ရွက်မှုလုပ်ငန်းအဖွဲ့၏ တာဝန်များမှာ စိုက်ပျိုးရေးမူဝါ၏များ ညီညွှတ်မှုရှိစေရေးကို မြှင့်တင်ဆောင်ရွက်ခြင်း၊ နှစ်နိုင်ငံစလုံး၏ စိုက်ပျိုးရေးဆိုင်ရာ စံချိန်စံညွှန်းများကို အပြန်အလှန်အသိအမှတ်ပြုခြင်း၊ စိုက်ပျိုးရေးဆိုင်ရာ အခြေခံအဆောက်အအုံ၊ စက်မှုဇုန်များ၊ ထုတ်ကုန်များ၏ အရည်အသွေးနှင့် ဘေးကင်းမှုဆိုင်ရာ စမ်းသပ်စစ်ဆေးသည့်စင်တာများ တည်ထောင်မှုကို တိုးတတ်စေခြင်း၊ စိုက်ပျိုးရေးပညာရှင်များပူးတွဲပြီး ပြုစုပျိုးထောင်ပေးခြင်း၊ နှစ်နိုင်ငံအကြား  လေ့လာရေးခရီးစဉ်များစီစဉ်ပြီး နည်းပညာများနှင့် သတင်းအချက်အလက်များဖလှယ်ခြင်း၊ နယ်စပ်ဖြတ်ကျော်တိရစ္ဆာန်များနှင့် အပင်များမှတဆင့်ဖြစ်ပွားသော ကူးစက်ရောဂါများကို ကာကွယ်ထိန်းချုပ်နိုင်ရေး ဆောင်ရွက်ခြင်း၊ စံနှုန်းများသတ်မှတ်ခြင်း၊ စက်မှုလယ်ယာကူးပြောင်းနိုင်ရေး ဆောင်ရွက်ခြင်းနှင့် တန်ဖိုးမြှင့်စိုက်ပျိုးရေးထုတ်ကုန်များထုတ်လုပ်ခြင်းတို့ကို ဆောင်ရွက်ခြင်း၊ ဘက်စုံစိုက်ပျိုးထုတ်လုပ်နိုင်စွမ်း မြှင့်တင်ဆောင်ရွက်ခြင်း၊ ဈေးကွက်ရရှိရေး အပြန်အလှန်ချိတ်ဆက်ဆောင်ရွက်ခြင်းတို့ ဖြစ်သည်။

၆။ နယ်စပ်စီးပွားရေးပူးပေါင်းဆောင်ရွက်မှုဇုန်များပူးပေါင်းဆောင်ရွက်မှုလုပ်ငန်းအဖွဲ့၏ တာဝန်များမှာ နှစ်နိုင်ငံအကြား သင့်လျော်သောဒေသတွင် နယ်စပ်စီးပွားရေးပူးပေါင်းဆောက်ရွက်မှုဇုန်များတည်ဆောက်နိုင်ရေး တိုက်တွန်းဆောင်ရွက်သွားခြင်း၊ နှစ်နိုင်ငံပူးပေါင်းဆောင်ရွက်မှုဇုန်များအကြား လူအဝင်အထွက်စီးဆင်းမှု အဆင်ပြေချောမွေ့စေရေး ညှိနိူင်းဆောင်ရွက်ခြင်း၊ အခြေခံအဆောက်အဦ၊ ကုန်သွယ်ရေး၊ ရင်းနှီးမြှပ်နှံမှု၊ ထုတ်လုပ်မှု၊ ထောက်ပံ့ပို့ဆောင်ရေးနှင့် ဘဏ္ဍာရေးဆိုင်ရာကဏ္ဍများတွင် ပူးပေါင်းဆောင်ရွက်မှုများနှင့် နည်းပညာ ဖလှယ်မှုများပိုမိုဆောင်ရွက်သွားနိုင်ရန်တို့ ဖြစ်သည်။

၇။ ဒီဂျစ်တယ်စီးပွားဆိုင်ရာပူးပေါင်းဆောင်ရွက်မှုလုပ်ငန်းအဖွဲ့၏ တာဝန်များမှာ ဒီဂျစ်တယ်စီးပွားရေး လုပ်ငန်းနှင့်သက်ဆိုင်သည့် အခြေခံအဆောက်အဦးများတည်ဆောက်ခြင်းတွင် ပူးပေါင်းဆောင်ရွက်ခြင်း၊ ဒီဂျစ်တယ်စီးပွားရေးလုပ်ငန်းများဖွံ့ဖြိုးတိုးတတ်စေရေးအတွက် နည်းလမ်းအမျိုးမျိုးဖြင့် ပံ့ပိုးကူညီခြင်း၊ ဒီဂျစ်တယ်နည်းပညာဖလှယ်ရေး အသိပညာပေးခြင်းအစီအစဉ်များကို ပူးပေါင်းဆောင်ရွက်ခြင်းတို့ ဖြစ်သည်။

၈။ ငွေရေးကြေးရေးဆိုင်ရာပူးပေါင်းဆောင်ရွက်မှုလုပ်ငန်းအဖွဲ့၏ တာဝန်များမှာ နှစ်နိုင်ငံအကြား ငွေရေးကြေးရေးအပေးအယူကိစ္စရပ်များအဆင်ပြေချောမွေ့စေမည့် နည်းလမ်းများချမှတ်ဆောင်ရွက်ခြင်း၊ ဘဏ္ဍာရေးဆိုင်ရာအဖွဲ့အစည်းများအကြား ချိတ်ဆက်ဆောင်ရွက်မှုခိုင်မာရေး၊ အတွေ့အကြုံနည်းပညာများ၊  သတင်းအချက်အလက်များ ဖလှယ်နိုင်ရေးကို ပံ့ပိုးဆောင်ရွက်ခြင်း၊ ငွေရေးကြေးရေးဆိုင်ရာ ပြသာနာများကို ပူးပေါင်းဖြေရှင်းဆောင်ရွက်ခြင်းတို့ ဖြစ်သည်။

၉။ ခရီးသွားလာရေးဆိုင်ရာပူးပေါင်းဆောင်ရွက်မှုလုပ်ငန်းအဖွဲ့၏ တာဝန်များမှာ နှစ်နိုင်ငံခရီးသွားလာရေး အစီအစဉ်များကို အကောင်အထည်ဖော်ဆောင်ရွက်ခြင်း၊ နှစ်နိုင်ငံခရီးသွားများဖြတ်သန်းသွားလာမှုလွယ်ကူချောမွေ့စေရေးကို ပံ့ပိုးပေးခြင်း၊ ခရီးသွားလုပ်ငန်းများတွင် ရင်းနှီးမြုပ်နှံမှုမြှင့်တင်ရေးနည်းလမ်းများ ချမှတ်ဆောင်ရွက်ခြင်း၊ ခရီးသွားလုပ်ငန်းဆိုင်ရာ သတင်းအချက်အလက်ဖလှယ်ခြင်းတို့ ဖြစ်သည်။

၁၀။ သတင်းအချက်အလက်ပူးပေါင်းဆောက်ရွက်မှုလုပ်ငန်းအဖွဲ့၏ တာဝန်များမှာ စီးပွားရေးစင်္ကြံတည်ထောင်မှုနှင့်ပတ်သတ်ပြီး ပြည်သူလူထုမှ နားလည်သဘောပေါက်စေရန်၊ ၎င်း၏အရေးပါမှုနှင့် ဖြစ်ပေါ်လာနိုင်သည့်အနေအထားကိုလည်း ပြည်သူတွေများသိရှိနိုင်စေရန်အတွက် ညှိနိူင်း ဆောင်ရွက်ခြင်းတို့ ဖြစ်သည်။

၁၁။ ဒေသအဆင့်ပူးပေါင်းဆောင်ရွက်မှုလုပ်ငန်းအဖွဲ့၏ တာဝန်များမှာ ရင်းနှီးမြုပ်နှံမှုများဆွဲဆောင်ခြင်း၊ မြို့ပြစီမံကိန်းများနှင့် စက်မှုဇုန်များကို ဖော်ထုတ်ခြင်းနှင့် မြို့ပြအဆောင်အယောင်တည်ဆောက်ခြင်း စသည့်ကဏ္ဍများတွင် ပြုပြင်ပြောင်းလဲဖြေလျော့မှုများဆောင်ရွက်ခြင်းဖြင့် နှစ်နိုင်ငံလုံးမှမြို့တော်များနှင့် ခရိုင်များအကြား ခိုင်မာသောပူးပေါင်းဆောင်ရွက်မှုများနှင့် အပြန်အလှန်သင်ယူမှုများမြှင့်တင်ပေးရန်တို့ ဖြစ်သည်။

၁၂။ ဂေဟစနစ်ဆိုင်ရာသဘာဝပတ်ဝန်းကျင်ပူးပေါင်းဆောင်ရွက်မှုလုပ်ငန်းအဖွဲ့၏ တာဝန်များမှာ ဂေဟဝန်းကျင်ဥပဒေများနှင့် နည်းဥပဒေများကို ချမှတ်ခြင်းနှင့် ဆက်စပ်မူဝါဒများကို အများပြည်သူသိရှိစေရေးအတွက် ဖြန့်ဝေခြင်း၊ ပူးပေါင်းဆောင်ရွက်မှုကာလအတွင်း သယံဇာတကာကွယ်စောင့်ရှောက်ခြင်းနှင့် ဂေဟဝန်းကျင်ကာကွယ်ခြင်းတို့ကို သက်ဆိုင်သူများမှ ထိထိရောက်ရောက်ဆောင်ရွက်နိုင်ရေး လမ်းညွှန်မှုပေးခြင်းတို့ ဖြစ်သည်။ 

၄။ တရုတ်–မြန်မာစီးပွားရေးစင်္ကြံ စီမံခန့်ခွဲမှုအဖွဲ့

တရုတ်-မြန်မာစီးပွားရေးစင်္ကြံ စီမံခန့်ခွဲမှုအဖွဲ့ကို ၂၀၁၉ ခုနှစ်၊ ဇန်နဝါရီလ၂၅ ရက်နေ့တွင် တရုတ်-မြန်မာစီးပွားရေးစင်္ကြံ ပူးတွဲကော်မတီဥက္ကဋ္ဌ ဦးစိုးဝင်းက လက်မှတ်ရေးထိုးဖွဲ့စည်းခဲ့သည်။ ၎င်းအဖွဲ့ကို တရုတ်-မြန်မာစီးပွားရေးစင်္ကြံအကောင်အထည်ဖော်ရာတွင် လုပ်ငန်းများထိရောက်စွာဆောင်ရွက်နိုင်ရန်အတွက် ဖွဲ့စည်းခဲ့ခြင်းဖြစ်ကြောင်း ဖော်ပြထားသည်။ ထိုအဖွဲ့သည် စီးပွားရေးစင်္ကြံအောက်တွင် ဖွဲ့စည်းသောကော်မတီများအဖွဲ့များအနက် အစိုးရဝန်ထမ်းမဟုတ်သော ပြင်ပပညာရှင်များပါဝင်သည့် အဖွဲ့ဖြစ်သည်။

စီမံခန့်ခွဲမှုကော်မတီ၏ အဖွဲ့ခေါင်းဆောင်အဖြစ် စီမံကိန်းနှင့်ဘဏ္ဍာရေးဝန်ကြီးဌာနမှ ဒုတိယဝန်ကြီး ဦးဆက်အောင်က တာဝန်ယူပြီး ဒေါက်တာ မင်းရဲပိုင်ဟိန်း(ဒုတိယဝန်ကြီး၊ စက်မှုဝန်ကြီးဌာန)၊ ဦးမျိုးမြင့်(ဥက္ကဋ္ဌ မြန်မာဖွံ့ဖြိုးမှု အဖွဲ့အစည်း)၊ ဒေါက်တာမောင်မောင်လွင်(အကြီးတန်း သုတေသီ၊ မြန်မာဖွံ့ဖြိုးမှုအဖွဲ့အစည်း)၊ ဒေါက်တာမျိုးညွန့်(စီးပွားရေးပညာရှင်)၊ ဒေါက်တာသိန်းဆွေ(အငြိမ်းစားစီးပွားရေးပညာရှင်၊ အာရှဖွံ့ဖြိုးမှုဘဏ်)၊ ဒေါက်တာ မင်းညို(စီးပွားရေးပညာရှင်)၊ ဒေါက်တာ ဘိုဘိုငယ်(ဒုတိယဥက္ကဋ္ဌ၊ မြန်မာနိုင်ငံတော်ဗဟိုဘဏ်)၊ ဦးဇော်လင်းထွဋ်(အမှုဆောင်အရာရှိချုပ်၊ Myanmar Payment Union)၊ ဦးထွန်းဇော်(ဒုတိယညွှန်ကြားရေးမှုးချုပ်၊ ငွေရေးကြေးရေးကြီးကြပ်စစ်ဆေးရေးဦးစီးဌာန၊ စီမံကိန်းနှင့်ဘဏ္ဍာရေးဝန်ကြီးဌာန)၊ ဒေါ်မို့မို့နိုင်(ညွှန်ကြားရေးမှူး၊ နိုင်ငံခြားစီးပွားဆက်သွယ်ရေးဦးစီးဌာန၊ ရင်းနှီးမြုပ်နှံမှုနှင့်နိုင်ငံခြားစီးပွားဆက်သွယ်ရေးဝန်ကြီးဌာန)တို့က အဖွဲ့ဝင်များအဖြစ် ပါဝင်ကြသည်။

၅။ နှစ်နိုင်ငံနယ်စပ်စီးပွားရေးပူးပေါင်းဆောင်ရွက်မှုဇုန် ဗဟိုကော်မတီ

မြန်မာ-တရုတ်နယ်စပ်စီးပွားရေးပူးပေါင်းဆောင်ရွက်မှုဇုန် အကောင်အထည်ဖော်ရေး ဗဟိုကော်မတီကို ၂၀၁၈ ခုနှစ်၊ ဇူလိုင်လက ဖွဲ့စည်းခဲ့သည်။

တရုတ်-မြန်မာစီးပွားရေးစင်္ကြံ ခေါင်းစဉ်အောက်တွင် အစောဆုံးဖွဲ့စည်းခဲ့ပြီး နှစ်နိုင်ငံအကြား စီးပွားရေးစင်္ကြံ နားလည်မှုစာချွန်လွှာကို လက်မှတ်မရေးထိုးမီ ဖွဲ့စည်းခဲ့သောကော်မတီ ဖြစ်သည်။

နှစ်နိုင်ငံအကြား နယ်စပ်စီးပွားရေးဇုန်များတည်ဆောက်ရန် ၂၀၁၆ ခုနှစ်၊ သြဂုတ်လတွင် ဒေါ်အောင်ဆန်းစုကြည်၏တရုတ်ပြည်ခရီးစဉ်အတွင်း သဘောတူညီခဲ့ပြီး ၂၀၁၇ ခုနှစ်၊ မေလတွင် ပထမဆုံးအကြိမ်ကျင်းပသော ခါးပတ်တစ်ကွင်းလမ်းတစ်စင်းဖိုရမ်တွင် နားလည်မှုစာချွန်လွှာကို လက်မှတ်ရေးထိုးခဲ့သည်။

ဗဟိုကော်မတီဥက္ကဋ္ဌအဖြစ် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊  ပြည်ထောင်စုဝန်ကြီး ဒေါက်တာ သန်းမြင့်က တာဝန်ယူပြီး ဒုတိယဥက္ကဋ္ဌများအဖြစ် နယ်စပ်စီးပွာရေးဇန်များတည်ဆောက်ရန်လျာထားသော ရှမ်းပြည်နယ်ဝန်ကြီးချုပ် ဒေါက်တာလင်းထွဋ်၊ ကချင်ပြည်နယ်ဝန်ကြီးချုပ် ဒေါက်တာ ခက်အောင်၊ ကိုးကန့်ကိုယ်ပိုင်အုပ်ချုပ်ခွင့်ရဒေသ ဥက္ကဋ္ဌ ဦးကျောက်တယ်ချန်တို့က တာဝန်ယူသည်။

ဗဟိုကော်မတီ၏ အတွင်းရေးမှုးအဖြစ် ဒုတိယဝန်ကြီး ဦးအောင်ထူးက တာဝန်ယူပြီး တွဲဖက်အတွင်းရေးမှုးအဖြစ် ကုန်သွယ်ရေးဦးစီးဌာန၏ ညွှန်ကြားရေးမှုးချုပ် ဦးရန်နိုင်ထွန်းက တာဝန်ယူထားသည်။

ပထမအကြိမ်အစည်းအဝေးကို ၂၀၁၈ ခုနှစ်၊ ဇူလိုင်လ ၁၂ ရက်နေ့တွင် နေပြည်တော်၌ ကျင်းပခဲ့သည်။ ဒုတိယအကြိမ်အစည်းအဝေးကို ၂၀၁၉ ခုနှစ်၊ မေလ၂၈ ရက်နေ့တွင် နေပြည်တော်၌ ကျင်းပခဲ့သည်။

တတိယအကြိမ်အစည်းအဝေးကို ဇူလိုင်လ ၂၆ ရက်နေ့က  တောင်ကြီးမြို့တွင် ကျင်းပခဲ့သည်။ စတုတ္ထအကြိမ်အစည်းအဝေးကို အောက်တိုဘာလ ၅ ရက်နေ့ကချင်ပြည်နယ်တွင် ကျင်းပခဲ့သည်။

မန္တလေးတိုင်းဒေသကြီးနှင့် ယူနန်ပြည်နယ်တို့အကြား မြန်မာစီးပွားရေးစင်္ကြံပူးတွဲတည်ထောင်ရေးမူဘောင်အောက်မှ ဒေသန္တရအဆင့်ပူးပေါင်းဆောင်ရွက်မှု နားလည်မှုစာချွန်လွှာကို ၂၀၂၀ ပြည့်နှစ်၊ ဇန်နဝါရီလ ၁၇ နှင့် ၁၈ ရက်နေ့တို့တွင် မြန်မာနိုင်ငံသို့လာရောက်သည့် သမ္မတ ရှီကျင့်ဖျင်၏ ခရီးစဉ်တွင် လက်မှတ်ရေးထိုးခဲ့သည်။

တရုတ်–မြန်မာ နယ်စပ်စီးပွားရေးပူးပေါင်းဆောင်ရွက်မှုဇုန် (မူဆယ်–ရွှေလီ) ဒေသအဆင့်လုပ်ငန်းအဖွဲ့

အမျိုးသားဒီမိုကရေစီအဖွဲ့ချုပ်လက်ထက်တွင် တရုတ်-မြန်မာ နယ်စပ်စီးပွားရေး ပူးပေါင်းဆောင်ရွက်မှုဇုန် (မူဆယ်-ရွှေလီ)အကောင်အထည်ဖော်ရေး ကိစ္စများဖြေရှင်း ဆောင်ရွက်နိုင်ရန် ၂၀၂၀ခုနှစ်ဇွန်တွင်မြန်မာနိုင်ငံကိုယ်စားပြု ဒေသအဆင့်လုပ်ငန်းအဖွဲ့ကို ဖွဲ့စည်းခဲ့သည်။

ကုန်သွယ်ရေးဦးစီးဌာနမှ ညွှန်ကြားရေးမှူးချုပ်ကို ဥက္ကဌ၊ ဒုတိယညွှန်ကြားရေးမှူးချုပ်ကိုဒုတိယဥက္ကဌ အဖြစ် တာဝန်ပေးထားသည်။ ရှမ်းပြည်နယ်မှ ပြည်နယ်ရဲတပ်ဖွဲ့မှူး၊ ဒုတိယပြည်နယ် အုပ်ချုပ်ရေးမှူး၊ ရင်းနှီးမြုပ်နှံမှုနှင့်ကုမ္ပဏီများညွှန်ကြားမှုဦးစီးဌာန၊လယ်ယာမြေစီမံခန့်ခွဲရေးနှင့်စာရင်းအင်းဦးစီးဌာန၊သစ်တောဦးစီးဌာန၊ ပတ်ဝန်းကျင်ထိန်းသိမ်းရေးဦးစီးဌာန၊ မြေတိုင်းဦးစီးဌာန၊ လူဝင်မှုကြီးကြပ်ရေးဦးစီးဌာန၊ လမ်းဦးစီးဌာန၊ မြို့ပြနှင့်အိမ်ရာ ဖွံ့ဖြိုးရေးဦးစီးဌာနမှ ညွှန်ကြားရေးမှူးများကိုအဖွဲ့ဝင်များ အဖြစ် ထည့်သွင်းထားသည်။  စီးပွားရေးပညာရှင် ဦးသုတအောင်ကိုလည်း အဖွဲ့ဝင်အဖြစ်ထည့်သွင်းထားသည်။

မူဆယ် (၁၀၅)မိုင်ကုန်သွယ်ရေးဇုန်၊ ကုန်သွယ်ရေး ဦးစီးဌာနမှ ညွှန်ကြားရေးမှူးကို အတွင်းရေးမှူးအဖြစ်၊ မူဆယ်ခရိုင်အထွေထွေအုပ်ချုပ်ရေးဦးစီးဌာနမှ ခရိုင်အုပ်ချုပ်ရေးမှူးကို တွဲဖက်အတွင်းရေးမှူး (၁)အဖြစ်၊ ရှမ်းပြည်နယ်အကောက်ခွန်ဦးစီးဌာနမှ ညွှန်ကြားရေးမှူးကို တွဲဖက်အတွင်းရေးမှူး(၁)အဖြစ် တာဝန် ပေးထားသည်။

လုပ်ငန်းအဖွဲ့၏ တာဝန်များမှာ ပူးပေါင်းဆောင်ရွက်မှုဇုန်၏လေးဖက်လေးတန်နယ်နိမိတ်များ တည်နေရာဖြစ်နိုင်ခြေနှင့်အသေးစိတ်စီမံကိန်းများ၊စီမံခန့်ခွဲမှုစနစ်၊ဆောင်ရွက်မည့်ဧရိယာပုံစံတို့ကို မိမိနိုင်ငံဘက်အခြမ်းတွင် ကွင်းဆင်းလေ့လာပြီး စီမံချက်ရေးရန်၊ နိုင်ငံအလိုက်ရေးဆွဲထားသည့် အကြမ်းဖျင်းစီမံချက်ကို နှစ်နိုင်ငံဒေသအဆင့်လုပ်ငန်းအဖွဲ့များနှင့်ညှိနိူင်းကာ နယ်စပ်စီးပွားရေး ပူးပေါင်းဆောင်ရွက်မှုဇုန် တည်ထောင်ရေးဖြစ်နိုင်ခြေကို ပူးပေါင်း ဆောင်ရွက်ရမည်ဖြစ်သည်။

ထို့အပြင်နှစ်နိုင်ငံဒေသအဆင့် ပူးပေါင်းစီမံရေးဆွဲထားသည့် ဇုန်အကောင်အထည်ဖော်ရေးအတွက် နှစ်နိုင်ငံဗဟိုကော်မတီများမှ တဆင့်သက်ဆိုင်ရာပြည်ထောင်စုအစိုးရအဖွဲ့ကို တင်ပြရမည်ဟုပါရှိသည်။

နှစ်နိုင်ငံဒေသအဆင့်လုပ်ငန်းအဖွဲ့များနှင့်သက်ဆိုင်ရာ ဗဟိုကော်မတီ၏ တင်ပြချက်များ၊ မူဘောင်သဘောတူညီချက် (မူကြမ်း)တွင်ပါဝင်သည့် အချက်များကို သဘောတူညီချက်ရရှိရေးအတွက် ပူးတွဲဆောင်ရွက်ကြရန်၊ ဇုန် တည်ဆောက်ရေး လုပ်ငန်းများအတွက် အခြေခံကောင်းများချမှတ်ပေးရန်၊ ဇုန်တည်ထောင်ရေးဆိုင်ရာ အခြေအနေများကို ဗဟိုကော်မတီသို့ သတ်မှတ်ထားသည့် အချိန်တွင်လည်းကောင်း၊ ထူးခြားအခြေအနေများကို အချိန်နှင့်တပြေးညီ လည်းကောင်း တင်ပြရမည် ဖော်ပြထားသည်။

စစ်ကောင်စီလက်ထက် ပြင်ဆင်ဖွဲ့စည်းခဲ့သည့် တရုတ်-မြန်မာစီးပွားရေး စင်္ကြံကော်မတီများ

စစ်ကောင်စီမှ အာဏာသိမ်းပြီးတလအကြာတွင် တရုတ်-မြန်မာစီးပွားရေးစင်္ကြံအောက်ရှိ စီမံကိန်းများ အကောင်အထည်ရေးအတွက် ဦးဆောင်ရန်အရေးပါသည့်ကော်မတီများကို ပြန်လည်ဖွဲ့စည်းခဲ့သည်။ စစ်ကောင်စီမှပြန်လည်ဖွဲ့စည်းခဲ့သည့်ကော်မတီများမှာတာဝန်ယူသူများပြောင်းလဲသွားသော်လည်း အမျိုးသားဒီမိုကရေစီအဖွဲ့ချုပ်လက်ထက်တွင်ဖွဲ့စည်းထားသည့် ဖွဲ့စည်းပုံအတိုင်းထားရှိပြီး တာဝန်များမှာသိသိသာသာပြောင်းလဲခြင်းမရှိသည်ကိုတွေ့ရသည်။

ထိုကော်မတီများတွင် အစောဆုံးပြန်ပြန်လည်ဖွဲ့စည်းခဲ့သည့် ကော်မတီမှာ စီးပွားရေးစင်္ကြံနှင့် နယ်စပ်စီးပွားရေးပူးပေါင်းဆောင်ရွက်မှုဇုန်များတည်ထောင်ရေးကိစ္စများကို ကဏ္ဍအလိုက်၊ သက်ဆိုင်ရာ ဝန်ကြီးဌာနများ၊ တိုင်းဒေသကြီးပြည်နယ်များမှ အကောင်အထည် ဖော်ရန်၊ဆန်းစစ်လေ့လာရန်၊ မူဝါဒများချမှတ်ရန် အတွက် အရေးပါသော ရပ်ဝန်းနှင့် ပိုးလမ်းမစီမံကိန်း အကောင်အထည်ဖော် ဆောင်ရွက်ရေး ဦးဆောင်ကော်မတီ ဖြစ်သည်။

မတ်၁၁ရက်နေ့တွင် ပြန်လည်ဖွဲ့စည်းခဲ့သည့် ကော်မတီတွင် စစ်ကောင်စီ၏ဥက္ကဌ ဗိုလ်ချုပ်မှူးကြီး မင်းအောင်လိူင်က ဥက္ကဌအဖြစ်တာဝန်ယူပြီး၊ စစ်ကောင်စီ၏ ဒုဥက္ကဌ ဒုတိယ ဗိုလ်ချုပ်မှူး ကြီးစိုးဝင်းက ဒုတိယဥက္ကဌအဖြစ်တာဝန်ယူသည်။ ပြည်ထဲရေး၊နိုင်ငံခြားရေး၊ပြည်ထောင်စုအစိုးရဖွဲ့ရုံး၊ နယ်စပ်ရေးရာ၊စီမံကိန်းဘဏ္ဍာရေး၊စက်မှု၊ ရင်းနှီးမြုပ်နှံမှုနှင့် နိုင်ငံခြားစီးပွားဆက်သွယ်ရေး၊ အပြည်ပြည်ဆိုင်ရာပူးပေါင်းဆောင်ရွက်ရေး၊ ပြန်ကြားရေး၊ သာသနာရေးနှင့်ယဉ်ကျေးမှု၊ စိုက်ပျိုးရေး၊မွေးမြူရေးနှင့် ဆည်မြောင်း၊ ပို့ဆောင်ဆက်သွယ်ရေး၊ သယံဇာတနှင့် သဘာဝပတ်ဝန်းကျင်ထိန်းသိမ်းရေး၊လျှပ်စစ်နှင့်စွမ်းအင်၊ အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အား၊စီးပွားရေးနှင့်ကူးသန်းရောင်းဝယ်ရေး၊ ပညာရေး၊ကျန်းမာရေး၊ ဆောက်လုပ်ရေး၊ လူမူဝန်ထမ်း၊ကယ်ဆယ်ရေးနှင့်ပြန်လည်နေရာချထားရေး၊ဟိုတယ်နှင့်ခရီးသွားလာရေးဝန်ကြီးဌာနတို့က ဝန်ကြီးများကို အဖွဲ့ဝင်များ အဖြစ် ထည့်သွင်း ထားသည်။

ပြည်ထောင်စုရှေ့နေချုပ်ရုံးမှ ပြည်ထောင်စုရှေ့နေချုပ်၊ ပြည်ထောင်စုစာရင်း စစ်ချုပ်ရုံးမှ ပြည်ထောင်စု စာရင်းစစ်ချုပ်၊ နေပြည်တော်ကောင်စီမှ ဥက္ကဌ တို့ကိုလည်း အဖွဲ့ဝင်များ အဖြစ် ထည့်သွင်းထားသည်။

ထို့အပြင် တရုတ်-မြန်မာစီးပွားရေး စင်္ကြံဖြတ်သန်းသွားမည့် အရေးပါသော ကချင်ပြည်နယ်၊ မန္တလေးတိုင်း၊ ရခိုင်ပြည်နယ်၊ ရန်ကုန်တိုင်း၊ရှမ်းပြည်နယ်တို့မှ အုပ်ချုပ်ရေးကောင်စီများမှ ဥက္ကဌများကိုလည်း အဖွဲ့ဝင်အဖြစ် ဖော်ပြထားသည်။ နိုင်ငံခြားရေးဝန်ကြီးဌာနမှ အမြဲတမ်း အတွင်းဝန်ကို အတွင်းရေးမှူးအဖြစ် ဖော်ပြထားသည်။ ဦးဆောင်ကော်မတီ၏တာဝန်များမှာ အမျိုးသားဒီမိုကရေစီအဖွဲ့ချုပ်လက်ထက်တွင် ချမှတ်ထားသည့် တာဝန်များအတိုင်းမပြောင်းလဲဘဲ ဖော်ပြထားသည်။

တရုတ်-မြန်မာ စီးပွားရေးစင်္ကြံ ပူးတွဲကော်မတီ

စစ်ကောင်စီသည် တရုတ်-မြန်မာစီးပွားရေးစင်္ကြံ အောက်ရှိ စီမံကိန်းများကို အဆိုပြုခြင်း၊ လေ့လာခြင်း၊ နှစ်နိုင်ငံကြားပူးပေါင်းဆောင်ရွက်မှုလုပ်ငန်းအဖွဲ့များဖွဲ့ခြင်း၊နားလည်မှုစာချွန်လွှာများကိုအကောင်အထည်ဖော်ခြင်းတို့ကို အဓိကလုပ်ဆောင်မည့် တရုတ်-မြန်မာ စီးပွားရေးစင်္ကြံ ပူးတွဲကော်မတီကိုမတ်၁၈ရက်တွင် ပြန်လည်ဖွဲ့စည်းခဲ့သည်။

ထိုကော်မတီတွင်စီမံကိန်းနှင့်ဘဏ္ဍာရေးဝန်ကြီးဌာနမှ ဝန်ကြီးက ဥက္ကဌဖြစ်ပြီး၊ စိုက်ပျိုးရေး၊ မွေးမြူရေးနှင့်ဆည်မြောင်း၊ ပို့ဆောင်ရေးနှင့်ဆက်သွယ်ရေး၊လျှပ်စစ်နှင့်စွမ်းအင်၊ စီးပွားရေးနှင့် ကူးသန်းရောင်းဝယ်ရေး၊ စီမံကိန်းနှင့်ဘဏ္ဍာရေး၊ဆောက်လုပ်ရေးမှဒုဝန်ကြီးက အဖွဲ့ဝင်ဖြစ်သည်။ ပြည်ထောင်စုရှေ့နေ့ချုပ်ရုံးမှဒုတိယရှေ့နေချုပ်နှင့်နေပြည်တော်ကောင်စီမှ အဖွဲ့ဝင်တို့လည်း ပါဝင်သည်။

စီးပွားရေးစင်္ကြံစီမံကိန်းများဖြတ်သန်းသွားမည့် မကွေးတိုင်း၊ မန္တလေးတိုင်း၊ ရခိုင်ပြည်နယ်၊ ရန်ကုန်တိုင်း၊ရှမ်းပြည်နယ်၊ဧရာဝတီတိုင်းမှစီမံအုပ်ချုပ်ရေး ကောင်စီအဖွဲ့ဝင်များကိုလည်း အဖွဲ့ဝင်များအဖြစ် ထည့်သွင်းထားသည်။ ထို့အပြင်ဗဟိုဘဏ်မှ ဒုတိယဥက္ကဌ ၊နိုင်ငံခြားရေး၊ သယံဇာတနှင့် သဘာဝပတ်ဝန်းကျင်ထိန်းသိမ်းရေး၊ဟိုတယ်နှင့်ခရီးသွားလာရေးဝန်ကြီးဌာနမှ အမြဲတမ်းအတွင်းဝန်များ လည်း အဖွဲ့ဝင်အဖြစ်ပါဝင်သည်။

စီမံကိန်းနှင့်ဘဏ္ဍာရေးဝန်ကြီးဌာမှ ညွှန်ကြားရေးမှုးချုပ်၊နိုင်ငံခြားစီးပွားဆက်သွယ်ဦးစီးဌာနမှ ညွှန်ကြားရေးမှုးချုပ်တို့ကို အတွင်းရေးမှုး၊တွဲဖက်အတွင်းရေးမှုးအဖြစ်တာဝန်ပေးထားသည်။

ကော်မတီ၏အဓိကလုပ်ငန်း တာဝန်များတွင် အမျိုးသားဒီမိုကရေစီအဖွဲ့ချုပ်က ချမှတ်ထားသည့် မူဝါဒများအများအားဖြင့်တူညီသော်လည်း၊ကော်မတီ၏ အဓိကလုပ်ငန်းတာဝန်တခုဖြစ်သည့် “ပိုမို ကောင်းမွန်သော ရင်းနှီးမြုပ်နှံမှုဝန်းကျင်ဖန်တီးရေးနှင့် လျင်မြန်လျောမွေ့စေရေးအတွက် စေ့စပ်ညှိနိူင်းခြင်းဖြင့် ပြသာနာရပ်များကို ဖြေရှင်းဆောင်ရွက်ခြင်း” အချက်ကိုမူ ပြန်လည် ထည့်သွင်းထားခြင်း မရှိတော့သည်ကို တွေ့ရသည်။ ထို့အပြင် အမျိုးသား ဒီမိုကရေစီအဖွဲ့ချုပ် လက်ထက်က “စီးပွားရေးစင်္ကြံဖွံ့ဖြိုးရေး အတွက်နှစ်ဖက်စလုံးမှ ပြည်သူလူထုပါဝင်ရေးကို အားပေး ဆောင်ရွက်မည်”ဟု အဓိကလုပ်ငန်း တာဝန်ထဲတွင် ထည့်သွင်းထားသည်။ ထိုအချက်သည် စစ်ကောင်စီက ပြန်လည်ဖွဲ့စည်းခဲ့သည့် ကော်မတီ၏ အဓိကလုပ်ငန်း တာဝန်ထဲတွင်ပါဝင်ခြင်း မရှိတော့သည်ကို တွေ့ရသည်။

မြန်မာ–တရုတ်နယ်စပ်စီးပွားရေးပူးပေါင်းဆောင်ရွက်မှုဇုန် ဗဟိုကော်မတီ နှင့်ဒေသအဆင့်လုပ်ငန်းကော်မတီ

တရုတ်-မြန်မာစီးပွားရေးစင်္ကြံအောက်တွင် ကျောရိုးစီမံကိန်းတခုဖြစ်သည့် မြန်မာ-တရုတ်နှစ်နိုင်ငံကြား နယ်စပ်စီးပွားရေးဇုန်များတည်ဆောက်ရေး အတွက် တရုတ်နိုင်ငံနှင့် ပူးပေါင်းဆောင်ရွက်ရန် နယ်စပ်စီးပွားရေးပူးပေါင်းဆောင်ရွက်မှုဇုန် တည်ထောင် အကောင်အထည်ဖော်ရေးဆိုင်ရာ ဗဟိုကော်မတီကို မတ်လ၂၄ရက်နေ့တွင် ပြန်လည်ဖွဲ့စည်းခဲ့သည်။

စီးပွားရေးနှင့်ကူးသန်းရောင်းဝယ်ရေးဝန်ကြီးဌာနမှဝန်ကြီးကို ဥက္ကဌအဖြစ် ထည့်သွင်းထားပြီး စီမံကိန်းများ အကောင်အထည်ဖော်မည့် ကချင်ပြည်နယ်နှင့်ရှမ်းပြည်နယ်ရှိ စီမံအုပ်ချုပ်ရေးကောင်စီ ဥက္ကဌများကို ဒုတိယဥက္ကဌများအဖြစ်တာဝန်ပေးထားသည်။ အမျိုးသားဒီမိုကရေစီအဖွဲ့ချုပ် လက်ထက်က စီမံကိန်း အကောင်အထည်ဖော်မည့် ဒေသဖြစ်သည့်ကိုးကန့်ကိုယ်ပိုင် အုပ်ချုပ်ခွင့်ရဒေသစီမံ အုပ်ချုပ်ရေး ဥက္ကဌကိုလည်း ကော်မတီတွင် ဒုတိယဥက္ကဌအဖြစ်ခန့်အပ်ထားခဲ့သည်။ သို့ရာတွင် စစ်ကောင်စီသည် ၎င်းကို အဖွဲ့ဝင်အဖြစ်သာထည့်သွင်းထားသည်။

စီမံကိန်းနှင့်ဘဏ္ဍာရေးဝန်ကြီးဌာနမှဒုဝန်ကြီး၊ကချင်ပြည်နယ်၊ရှမ်းပြည်နယ်မှ စီမံအုပ်ချုပ် ကောင်စီအဖွဲ့ဝင်များ၊ စီးပွားရေးနှင့် ကူးသန်းရောင်းဝယ်ရေး ဝန်ကြီးဌာနမှ အမြဲတမ်းအတွင်းဝန်၊ အပြည်ပြည်ဆိုင်ရာ အဖွဲ့အစည်းများနှင့် စီးပွားရေးဦးစီးဌာနမှ  ညွှန်ကြားရေးမှူးချုပ်၊ ပြည်ထောင်စု အစိုးရအဖွဲ့ရုံးဝန်ကြီးဌာနမှ ညွှန်ကြားရေးမှူးချုပ်တို့ကိုလည်း အဖွဲ့ဝင်များအဖြစ် ထည့်သွင်းထားသည်။

နယ်စပ်ဒေသနှင့်တိုင်းရင်းသားလူမျိုးဖွံ့ဖြိုးတိုးတတ်ရေးဦးစီးဌာန၊စက်မှုကြီးကြပ်ရေးနှင့် စစ်ဆေးရေး ဦးစီးဌာန၊ အကောက်ခွန်ဦးစီးဌာန၊ပြည်တွင်းအခွန်ဦးစီးဌာန၊ရင်းနှီးမြုပ်နှံမှုနှင့် ကုမ္ပဏီများ ညွှန်ကြားမှုဦးစီးဌာန၊ လယ်ယာမြေစီမံခန့်ခွဲရေးနှင့်စာရင်းအင်းဦးစီးဌာန၊ သစ်တော ဦးစီးဌာန၊ လူဝင်မှုကြီးကြပ်ရေးဦးစီးဌာန၊မြို့ပြနှင့်အိမ်ရာဖွံ့ဖြိုးမှုဦးစီးဌာန၊ဟိုတယ်နှင့်ခရီးသွားလာညွှန်ကြားမှုဦးစီးဌာနများ မှ ညွှန်ကြားရေးမှူးချုပ်များမှ အဖွဲ့ဝင်များအဖြစ်ပါဝင်ကြသည်။

စီးပွားရေးနှင့်ကူးသန်းရောင်းဝယ်ရေးဝန်ကြီးဌာနမှဒုဝန်ကြီးမှ အတွင်းရေးမှူးအဖြစ်၊ ကုန်သွယ်ရေး ဦးစီးဌာနမှ ညွှန်ကြားရေးမှူးချုပ်တို့ကို တွဲဖက်အတွင်းရေးမှူးများအဖြစ် ထည့်သွင်းထားသည်။ ကော်မတီ၏ လုပ်ငန်းတာဝန်များကိုသိသိသာသာ ပြောင်းလဲထားခြင်းမရှိသည်ကို တွေ့ရသည်။

လုပ်ငန်းကော်မတီ

မြန်မာ-တရုတ်နယ်စပ်စီးပွားရေးဇုန် လုပ်ငန်းကော်မတီကိုလည်း ဖွဲ့စည်းလိုက်ပြီး ကုန်သွယ်ရေးဦးစီးဌာနမှ ညွှန်ကြားရေးမှူးချုပ်က ဥက္ကဌ၊ ဒုတိယညွှန်ကြားရေးမှူးချုပ်က ဒုတိယဥက္ကဌအဖြစ် တာဝန်ပေးထားသည်။ ရှမ်းပြည်နယ်မှပြည်နယ်ရဲတပ်ဖွဲ့မှူး၊ဒုတိယပြည်နယ်အုပ်ချုပ်ရေးမှူး၊ရင်းနှီးမြုပ်နှံမှုနှင့်ကုမ္ပဏီများညွှန်ကြားမှုဦးစီးဌာန၊လယ်ယာမြေစီမံခန့်ခွဲရေးနှင့်စာရင်းအင်းဦးစီးဌာန၊သစ်တောဦးစီးဌာန၊ ပတ်ဝန်းကျင် ထိန်းသိမ်းရေး ဦးစီးဌာန၊ မြေတိုင်းဦးစီးဌာန၊ လူဝင်မှုကြီးကြပ်ရေးဦးစီးဌာန၊ လမ်းဦးစီးဌာန၊ မြို့ပြနှင့်အိမ်ရာ ဖွံ့ဖြိုးရေးဦးစီးဌာနမှ ညွှန်ကြားရေးမှူးများ ကိုအဖွဲ့ဝင်များ အဖြစ်ထည့်သွင်းထားသည်။ အမျိုးသားဒီမိုကရေစီ အဖွဲ့ချုပ် လက်ထက်တွင် ထည့်သွင်းထားခဲ့သော စီးပွားရေးပညာရှင် ဦးသုတအောင်ကို လည်း အဖွဲ့ဝင်အဖြစ်ပြန်လည် ထည့်သွင်းထားသည်။

မူဆယ် (၁၀၅)မိုင်ကုန်သွယ်ရေးဇုန်၊ ကုန်သွယ်ရေး ဦးစီးဌာနမှ ညွှန်ကြားရေးမှူးကို အတွင်းရေးမှူးအဖြစ်၊ မူဆယ်ခရိုင်အထွေထွေအုပ်ချုပ်ရေးဦးစီးဌာနမှ ခရိုင်အုပ်ချုပ်ရေးမှူးကိုတွဲဖက်အတွင်းရေးမှူး (၁)အဖြစ်၊ ရှမ်းပြည်နယ်အကောက်ခွန်ဦးစီးဌာနမှ ညွှန်ကြားရေးမှူးကို တွဲဖက်အတွင်းရေးမှူး(၁) အဖြစ် ထည့်သွင်းထားသည်။ ကော်မတီ၏တာဝန်များမှာ အမျိုးသားဒီမိုကရေစီအဖွဲ့ချုပ်လက်ထက်တွင် ချမှတ်ထားသည့် တာဝန်များအတိုင်းမပြောင်းလဲဘဲ ဖော်ပြထားသည်။

မှတ်ချက်-စီမံကိန်း အခြေအနေများကို ၂၀၂၁ခုနှစ် ဇူလိုင်လ ( ၆ ) ရက်နေ့တွင် ထပ်မံဖြည့်စွက်ထားပါသည်။