တရုတ်-မြန်မာဆက်ဆံရေး တပတ်တာ သတင်းအနှစ်ချုပ် နိုဝင်ဘာ ဒုတိယပတ် (နိုဝင်ဘာ ၇ ရက်မှ ၁၃ ရက်အထိ)

ယခုရက်သတ္တပတ်အတွင်း တရုတ်-မြန်မာဆက်ဆံရေးနှင့် သက်ဆိုင်သော ပြည်တွင်းပြည်ပ သတင်းနှင့် သုံးသပ်ချက်ပေါင်း ၇၀ နီးပါးကို ISP-Myanmar China Desk က စုစည်းခဲ့ပါသည်။ တပတ်တာအတွင်း ပေါ်ပေါက်ခဲ့သော သတင်းများမှ အလေးပေးအာရုံစိုက်သင့်သော ဖြစ်ရပ်များနှင့် အခြားသတင်း စုစည်းမှုများကို ISP-Myanmar China Desk မှ အနှစ်ချုပ် ဖော်ပြပေးမည် ဖြစ်ပါသည်။

ရွေးကောက်ပွဲ နောက်ဆက်တွဲ

နိုဝင်ဘာ ၈ ရက်က ကျင်းပခဲ့သော မြန်မာ့အထွေထွေရွေးကောက်ပွဲရလဒ်နှင့်အတူ ရွေးကောက်ပွဲနှင့် စပ်လျဉ်းသော သတင်းနှင့်ဆောင်းပါးအချို့ကို တရုတ်မီဒီယာများတွင် ယခုရက်သတ္တပတ်အတွင်း တွေ့ရှိရသည်။

နိုဝင်ဘာ ၁၁ ရက်က The Global Times မီဒီယာတွင် ဖော်ပြခဲ့သော ဆောင်းပါးတပုဒ်၌ မြန်မာ့ရွေးကောက်ပွဲအပေါ် ပူပန်မှုများရှိ၍ အနီးကပ်စောင့်ကြည့်လေ့လာသွားမည်ဟု ပြောကြားခဲ့သော အမေရိကန်နိုင်ငံ၏ Secretary of State (နိုင်ငံခြားရေးဝန်ကြီးနှင့် အဆင့်တူ)ဖြစ်သူ Mike Pompeo အနေဖြင့် ယင်းပူပန်မှုကို စွန့်လွှတ်သင့်ပြီဖြစ်ကြောင်း ဖော်ပြထားသည်။ အနောက်နိုင်ငံများအနေဖြင့် ဒေါ်အောင်ဆန်းစုကြည်အစိုးရကို ဒီမိုကရေစီပုံရိပ်ဟု အမည်တပ်ကာ တရုတ်ဆန့်ကျင်ရေးလမ်းစဉ်ကို လိုက်လိမ့်မည်ဟု ယူဆခဲ့ကြသော်လည်း မြန်မာနိုင်ငံသည် လက်ရှိအချိန်ထိ ဘက်မလိုက်၍ လွတ်လပ်သော နိုင်ငံခြားရေး မူဝါဒကိုသာ ကိုင်စွဲထားပြီး အာဆီယံနိုင်ငံများအပါအဝင် အိမ်နီးချင်းနိုင်ငံများနှင့် ခိုင်မာသော ဆက်ဆံရေးထူထောင်ကာ နိုင်ငံ၏ တိုးတက်ဖွံဖြိုးရေးကို လက်တွေ့ကျကျ ဦးစားပေးခဲ့သည်ဟု ဖော်ပြထားသည်။ တရုတ်-မြန်မာ နှစ်နိုင်ငံအနေဖြင့်လည်း နှစ်ဦးနှစ်ဖက် အကျိုးများဖွယ်ဖြစ်သည့် BRI စီမံကိန်းကို ပူပေါင်းဆောင်ရွက်နေကာ အနောက်နိုင်ငံများအနေဖြင့် အခြားနိုင်ငံတနိုင်ငံ၏ ရွေးချယ်ခွင့်အပေါ် ဝင်ရောက်ချယ်လှယ်နိုင်သည်ဟု ထင်မှတ်နေသည့် အတ္တစိတ်ကို လျှော့ချသင့်ပြီဖြစ်သည်ဟု ရေးသားဖော်ပြထားသည်။

နိုဝင်ဘာ ၁၂ ရက်တွင် ဖော်ပြသော အခြားဆောင်းပါးတပုဒ်တွင်လည်း ရွေးကောက်ပွဲရလဒ်များကို ဖော်ပြကာ မြန်မာနိုင်ငံအနေဖြင့် စီးပွားရေးဖွံ့ဖြိုးမှုကို ဦးစားပေးသင့်ကြောင်း၊ ကမ္ဘာ့ဈေးကွက်တွင် ယှဉ်ပြိုင်နိုင်ရေးအတွက် ပြင်းထန်သော သဘာဝပတ်ဝန်းကျင်ဆိုင်ရာ ဝါဒများ၊ သယံဇာတအရင်းအမြစ်အစွဲများကို ဖယ်ရှားပစ်ရမည်ဟု သတိပြုဖွယ် ဖော်ပြထားသည်။ မြန်မာနှင့် အမေရိကန်တို့၏ ဆက်ဆံရေးတွင် ပျားရည်ဆမ်းကာလများ ရှိခဲ့ကြသော်လည်း ရခိုင်မြောက်ပိုင်းအရေးနှင့်ပတ်သက်၍ ဖိအားပေးမှုများရှိလာချိန်တွင် မြန်မာလူထု၏ အနောက်နိုင်ငံများအပေါ် သဘောထားများလည်း ပြောင်းလဲလာကြောင်း ရေးသားထားသည်။ အဆိုပါဆောင်းပါးကို ရေးသားသူ ပီရှိဟုန်သည် တရုတ်အိမ်နီးချင်းနိုင်ငံများ သံတမန်ရေးရာ လေ့လာရေးစင်တာ၏ ပါမောက္ခတဦး ဖြစ်သည်။

အခြားသော ရွေးကောက်ပွဲနှင့် ဆက်စပ်သောသတင်းတပုဒ်မှာ မိုင်းတုံမြို့နယ်အတွင်းရှိ “ဝ” အဖွဲ့ ထိန်းချုပ်နယ်မြေမှ မဲရုံများတွင် အသက်မပြည့်သူများနှင့် မှတ်ပုံတင် မပါသူများ မဲလာပေးသဖြင့် ရှမ်းတိုင်းရင်းသားများဒီမိုကရေစီအဖွဲ့ချုပ်(SNLD) ကိုယ်စားလှယ်လောင်းက ကော်မရှင်အဖွဲ့ခွဲထံ တိုင်ကြားခဲ့ကြောင်း Eleven Media Group ၏ သတင်းဖော်ပြချက်ဖြစ်သည်။ မဲပေးသူများမှာ မဲစာရင်းတွင်လည်းမပါဝင်၊ မှတ်ပုံတင်လည်းမပါဝင်ဘဲ တိုကင်ကိုင်ကာ လာရောက်မဲပေးခဲ့၍ SNLD ကိုယ်စားလှယ်လောင်းက သွားရောက်လေ့လာရာ အသက်မပြည့်သူများ မဲလာမပေးရန် မဲအဖွဲ့တာဝန်ရှိသူများက တရုတ်စကားဖြင့် သတိပေးခဲ့ရကြောင်း ဖော်ပြထားသည်။

ထူးခြားချက်အနေဖြင့် အနောက်နိုင်ငံကြီးများဖြစ်ကြသော အမေရိကန်၊ ဗြိတိန်၊ ပြင်သစ်နှင့် အိမ်နီးချင်းနိုင်ငံများဖြစ်ကြသော ထိုင်းနှင့် အိန္ဒိယတို့က မြန်မာ့ရွေးကောက်ပွဲအတွက် ချီးကျူးဂုဏ်ပြုကြောင်း ပေးပို့ခဲ့ကြပြီး တရုတ်နိုင်ငံကမူ ရွေးကောက်ပွဲအပြီး တပတ်ကျော်အကြာ(ယနေ့ နိုဝင်ဘာ ၁၆ ရက် အထိ) ရွေးကောက်ပွဲနှင့် ပတ်သက်၍ တစုံတရာ ထုတ်ပြန်ခြင်း၊ ပေးပို့ခြင်း မရှိသေးပေ။

တရုတ်အကူအညီများ

တရုတ်နိုင်ငံမှ မူဆယ်မြို့အတွက် လှူဒါန်းပေးထားသော ကိုဗစ်-၁၉ ရောဂါပိုး စစ်ဆေးပေးသည့်စက်ကို အမြန်ဆုံးစမ်းသပ်အသုံးပြုရန် ကျန်းမာရေးနှင့် အားကစားဝန်ကြီးဌာန ပြည်ထောင်စုဝန်ကြီးထံ မူဆယ်မြို့နယ် ပြည်သူ့လွှတ်တော်ကိုယ်စားလှယ်  ဦးစိုင်းဖိုးမြတ်က နိုဝင်ဘာ ၅ ရက်တွင် ပြည်သူများကိုယ်စား စာတင်တောင်းဆိုခဲ့ကြောင်း Eleven Media Group က ဖော်ပြထားသည်။

အဆိုပါ တရုတ်ယွမ်ငွေ ၂၀,၁၇၆,၂၆၄ ယွမ်(မြန်မာကျပ်ငွေ သိန်းလေးထောင်ကျော်) တန်ဖိုးရှိ ကိုဗစ်-၁၉ ရောဂါ စစ်ဆေးပေးသည့် Gene Quantitative Detection စက်ကို တရုတ်ပြည်သူ့သမ္မတနိုင်ငံ ရွှေလီအစိုးရက မူဆယ်ခရိုင် အထွေထွေအုပ်ချုပ်ရေးဦးစီးဌာနသို့ အောက်တိုဘာ ၁၄ ရက်က လှူဒါန်းပေးခဲ့သည်။ စက်ပစ္စည်းများကို မူဆယ်ခရိုင် ပြည်သူ့ဆေးရုံသစ်ကြီး၌ တရုတ်ပညာရှင်များ ပါဝင်သောအဖွဲ့က အောက်တိုဘာ ၁၅ ရက်မှ   ၁၉ ရက်အထိ တပ်ဆင်ပေးခဲ့ကာ တရုတ်ကျွမ်းကျင်ပညာရှင်များက မူဆယ်ခရိုင်ရှိ ဓာတ်ခွဲဝန်ထမ်းများကို လေးရက်ကြာ လက်တွေ့စမ်းသပ် သင်ပြပေးခဲ့သည်။

တရုတ်အစိုးရက ယာဉ်မောင်းများနှင့် ယာဉ်နောက်လိုက်များကို ကိုဗစ်-၁၉ ကင်းစင်မှသာလျှင် ဝင်ရောက်သယ်ဆောင်ကုန်ချခွင့်များ ခွင့်ပြုနေပြီး ယခုအခါ COVID-19 Antigen Test Kit နည်းပါးလာကာ အလုံအလောက်စစ်ဆေးပေးနိုင်ခြင်းမရှိခြင်းတို့ကြောင့် ကုန်စည်စီးဆင်းမှု နှောင့်နှေးကြန့်ကြာနေကြောင်း Eleven Media Group တွင် ဖော်ပြထားသည်။ မြန်မာ-တရုတ် နှစ်နိုင်ငံ စီးပွားကူးသန်းရောင်းဝယ်ဖောက်ကားရာ နယ်စပ်ကုန်သွယ်မြို့ မူဆယ်သည် နေ့စဉ်ကုန်စည်သယ်ယူပို့ဆောင်မှု ကုန်ကားများ ပျမ်းမျှတစ်ရက်လျှင် ၁၀၀၀ နီးပါး ဝင်ထွက်သွားလာမှု ပြုလုပ်လျက်ရှိသည်။

ထို့အပြင် ယခုရက်သတ္တပတ်အတွင်း တရုတ်နိုင်ငံသည် အမေရိကန်ဒေါ်လာ ခြောက်သိန်းကျော် တန်ဖိုးရှိ အားကစားပစ္စည်း နှင့် အားကစားနည်းပညာ ကူညီထောက်ပံ့ရေး စီမံကိန်းဆိုင်ရာ ထောက်ပံ့ရေးပစ္စည်းများကို ကျန်းမာရေးနှင့် အားကစားဝန်ကြီးဌာနသို့ လွှဲပြောင်းပေးအပ်ခဲ့ပြီး PPE ဝတ်စုံ နှစ်သိန်းလေးသောင်း၊ နှာခေါင်းစည်း သုံးသိန်းကျော် ကိုလည်း လှူဒါန်းခဲ့သည်။ ထို့အတူ မကာအိုနှင့် ယူနန်အစိုးရတို့မှ စုစုပေါင်းယွမ် ရှစ်သန်း (အမေရိကန်ဒေါ်လာ ၁ ဒသမ ၂ သန်းခန့်) တန်ဖိုးရှိသော  N95 မျက်နှာဖုံး လေးသောင်းခြောက်ထောင်၊ PPE ဝတ်စုံပြည့် သုံးသောင်း နှင့် Ventilators ဆယ်ခု ကို လှူဒါန်းခဲ့သည်။ တရုတ်နိုင်ငံ၏ ပံ့ပိုးကူညီမှုဖြင့် မြန်မာနိုင်ငံ ရောဂါကာကွယ်ထိန်းချုပ်ရေးဗဟိုဌာနကို အမြန်ဆုံးစတင်တည်ဆောင်နိုင်ရေးအတွက် ဆောင်ရွက်နေပြီဖြစ်ကြောင်း မြန်မာ့အလင်းသတင်းစာက ဖော်ပြခဲ့သည်။

ကုန်သွယ်ရေး

တရုတ်နိုင်ငံတွင် နိုင်ငံတကာကုန်စည်ပြပွဲများ ပြုလုပ်လျက်ရှိပြီး မြန်မာ့ထွက်ကုန်များပြသရန် အခွင့်အလမ်းများရှိနေကြောင်း သတင်းဖော်ပြချက်များအရ သိရသည်။ ကုန်စည်ပြပွဲများမှာ ရှန်ဟိုင်းမြို့၌ နိုဝင်ဘာ ၅ ရက်မှ ၁၀ ရက်အထိ ကျင်းပခဲ့သော The 3rd China International Import Expo (CIIE) 2020 ESihf Hongqiao International Economic Forum၊ နန်နင်းမြို့၌ နိုဝင်ဘာ ၂၇ ရက် မှ ၃၀ ရက်အထိ ပြုလုပ်မည်ဖြစ်သော တရုတ်-အာဆီယံကုန်စည်ပြပွဲ၊ ကူမင်းမြို့တွင် ၂၀၂၁ ခုနှစ်၊ ဇန်နဝါရီ ၂၅ ရက်မှ ဖေဖော်ဝါရီ ၉ ရက်အထိ ကျင်းပသွားမည့် Kunming Spring Festival Shopping Expo ပြပွဲတို့ ဖြစ်ပြီး ပြပွဲအားလုံးသို့ မြန်မာနိုင်ငံအား တက်ရောက်ရန် ဖိတ်ကြားထားကြောင်း သိရသည်။

၂၀၂၀-၂၀၂၁ ဘဏ္ဍာနှစ် အောက်တိုဘာ ၁ ရက်မှ ၃၀ ရက်အထိ ယာယီစာရင်းအရ ဆန်နှင့် ဆန်ကွဲ အများဆုံးတင်ပို့ခဲ့သည့် နိုင်ငံများအနက် တရုတ်ပါဝင်ကြောင်း Eleven Media Group ၏သတင်းဖော်ပြချက်အရ သိရသည်။ တန်းမြင့်ဆန်များကို ရေကြောင်းမှတဆင့် ပြည်ပနိုင်ငံများသို့ တင်ပို့နေခြင်း၊ မြန်မာ့ဆန်ကို နှစ်အနည်းငယ်ကြာ ဝယ်ယူမှုရပ်နားထားခဲ့သည့် ပြည်ပနိုင်ငံတချို့ ပြန်လည်ဝယ်ယူလာခြင်းများ ရှိနေသော်လည်း ပြည်တွင်းငွေလဲနှုန်းများ ကျဆင်းနေသည့်အတွက် ရေကြောင်းကုန်သည်များအနေဖြင့် ဈေးပိုပေးနိုင်ခြင်းမရှိသောကြောင့် တရုတ်နယ်စပ်ကုန်သွယ်ရေးသို့ ပိုမိုရောင်းချနေရကြောင်း မြဝတီသတင်းဖော်ပြချက်အရ သိရသည်။

နိုဝင်ဘာလ ၉ ရက်က ရွှေလီမြို့တွင် မြန်မာနိုင်ငံသား လေးဦး၌ ကိုဗစ်-၁၉ ရောဂါပိုးတွေ့ရှိခဲ့ကြောင်း 7 Day Daily သတင်းစာ ဖော်ပြချက်အရ သိရသည်။ ပြီးခဲ့သည့် စက်တင်ဘာက ရွှေလီမြို့တွင် ရောဂါပိုးကူးစက်ခံရသူ နှစ်ဦးတွေ့ရှိပြီးနောက် တရုတ်-မြန်မာနယ်စပ်ကုန်သွယ်ရေး တပတ်ခန့်ရပ်နားခဲ့ရပြီး ရွှေလီမြို့ကိုလည်း တရုတ်အစိုးရက Lock Down ချခဲ့သည်။ ထို့ကြောင့် မူဆယ်မြို့ရှိ ကုန်သည်များအနေဖြင့် နယ်စပ်ကုန်သွယ်ရေး ရပ်ဆိုင်းမည်ကို စိုးရိမ်လျက်ရှိသည်။

နိုင်ငံတော် အစိုးရက တရားမဝင်ကုန်စည်များ တားဆီးထိန်းချုပ်ရေး ဆောင်ရွက်လျက်ရှိပြီး ယခုတပတ်အတွင်း မန္တလေး-မူဆယ် ပြည်ထောင်စုလမ်းမကြီးတလျှောက် နေ့စဉ် ပို့ကုန်ယာဉ် ၄၀၀ ကျော်၊ သွင်းကုန်ယာဉ် ၂၅၀ ခန့်ရှိကြောင်း နိုင်ငံပိုင် သတင်းစာ ဖော်ပြချက်အရသိရသည်။

အောက်တိုဘာလအတွင်း နယ်စပ်ကုန်သွယ်ရေးစခန်းများမှ ကုန်သွယ်မှုပမာဏ အမေရိကန်ဒေါ်လာ ၅၂၃ သန်းကျော် ရရှိထားကြောင်း မြဝတီသတင်းစာ ဖော်ပြချက်အရ သိရသည်။ တရုတ်-မြန်မာနယ်စပ်ကုန်သွယ်ရေးကို  မူဆယ်၊ လွယ်ဂျယ်၊ ကန်ပိုက်တီ၊ ချင်းရွှေဟော်၊ ကျိုင်းတုံ နယ်စပ်ဂိတ် ငါးခုမှတဆင့် ဆောင်ရွက်နေခြင်းဖြစ်ပြီး တရုတ်-မြန်မာနယ်စပ်ကုန်သွယ်ရေး ကိန်းဂဏန်းအချက်အလက်များကို ပုံကားချပ်များဖြင့် မြင်သာအောင် ISP China Desk က ပြုလုပ်ထားပါသည်။

အခြား

တရုတ်-မြန်မာ စီးပွားရေးစင်္ကြံအရွေ့အဖြစ် မူဆယ်-ရွှေလီ နယ်စပ်စီးပွားရေးဇုန် တည်ဆောက်ရန်အတွက် အတည်ပြုချက်ရယူရန် ပါဝင်သည့် မြေနေရာများကို စိစစ်နေကြောင်း မြဝတီသတင်းဖော်ပြချက်အရ သိရသည်။ တရုတ်-မြန်မာ နယ်စပ်တွင် နယ်စပ်စီးပွားရေး ပူးပေါင်းဆောင်ရွက်မှုဇုန် သုံးခုတည်ဆောက်သွားမည် ဖြစ်ပြီး မူဆယ်-ရွှေလီ နယ်စပ်စီးပွားရေး ပူးပေါင်းဆောင်ရွက်မှုဇုန်အပြင် ကန်ပိုက်တီနှင့် ချင်းရွှေဟော်တို့၌ တည်ဆောက်သွားရန် အစီအမံရှိသည်။

တရုတ်နိုင်ငံသားများ မြန်မာနိုင်ငံအတွင်းသို့ တရားမဝင် ဝင်ရောက်မှု သတင်းများကို တွေ့ရှိရခြင်း မရှိသည်မှာ ရက်သတ္တပတ် နှစ်ပတ်ခန့် ရှိလာပြီ ဖြစ်သည်။