မြန်မာ-တရုတ် နှစ်နိုင်ငံနယ်စပ် စီးပွားရေးပူးပေါင်းဆောင်ရွက်မှုဇုန်စီမံကိန်း
(မူဆယ်-ရွှေလီ နယ်စပ်စီးပွားရေးပူးပေါင်းဆောင်ရွက်မှုဇုန်)

စီမံကိန်းအကျဉ်းချုပ်

တရုတ်-မြန်မာ နှစ်နိုင်ငံ နယ်စပ်စီးပွားရေး ပူးပေါင်းဆောင်ရွက်မှုဇုန်စီမံကိန်းသည် တရုတ်နိုင်ငံ ယူနန်ပြည်နယ်နှင့် နယ်နိမိတ်ခြင်းထိစပ်လျက်ရှိသော ရှမ်းပြည်နယ်၊ ကချင်ပြည်နယ်တို့တွင် နယ်စပ်စီးပွားရေးပူးပေါင်းဆောင်ရွက်မှုဇုန်များ တည်ဆောက်သွားရန် ရည်မှန်းထားသော စီမံကိန်းဖြစ်သည်။ အဆိုပါစီမံကိန်းသည် တရုတ်-မြန်မာစီးပွားရေးစင်္ကြံအောက်တွင် ဦးစားပေးအဖြစ် အကောင်အထည်ဖော်ရန် အစောဆုံး ထည့်သွင်းခံရသော စီမံကိန်းလည်းဖြစ်သည်။

အထူးသဖြင့် နှစ်နိုင်ငံနယ်စပ်ရှိ နယ်စပ်မြို့များတွင် အခွန်ကင်းလွတ်ခွင့်ရသော ကုန်စည်ရောင်းဝယ် ဖောက်ကားရာ နေရာများ၊ နည်းပညာဆိုင်ရာ ဇုန်များ၊ အီလက်ထရောနစ် ကူးသန်းရောင်းဝယ်ရေး စနစ်သုံး လုပ်ငန်းများ၊ စိုက်ပျိုးရေးထုတ်ကုန် ရောင်းဝယ်ဖောက်ကားရေး ဇုန်များ၊ စက်မှုဇုန်များ၊ ပို့ကုန်လုပ်ငန်း ဇုန်များ၊ သွင်းကုန်လုပ်ငန်း ဇုန်များ၊ ကုန်သိုလှောင်ရုံများ တည်ဆောက်ရန် ရည်မှန်းထားသည်။ တရုတ်နိုင်ငံ ယူနန်ပြည်နယ်မှ အာဏာပိုင်များသည် နယ်စပ်စီးပွားရေးပူးပေါင်းဆောင်ရွက်မှုဇုန်စီမံကိန်း သုံးခုမှတဆင့် ကုန်စည်များကို တရုတ်-မြန်မာ စီးပွားရေးစင်္ကြံအတိုင်း ကျောက်ဖြူရေနက်ဆိပ်ကမ်းအထိ သယ်ဆောင်ကာ အိန္ဒိယသမုဒ္ဒရာမှတဆင့် အရှေ့တောင်အာရှနှင့် တောင်အာရှနိုင်ငံများကို တင်ပို့ရန် ရည်ရွယ်ထားသည်။

ထိုစက်မှုဇုန်များတည်ဆောက်ခြင်းဖြင့် ကုန်းတွင်းပိတ်ပြည်နယ်ဖြစ်သော ယူနန်ပြည်နယ်သည် တရုတ်နိုင်ငံအနောက်ပိုင်းပြည်နယ်များထဲတွင် အဓိကျသော ကုန်စည်စီးဆင်းရာ၊ ကုန်စည်တင်ပို့ရာနှင့် ကုန်စည်ထုတ်လုပ်ရာ ဗဟိုချက်တခုအဖြစ် ပြောင်းလဲပစ်လိုက်ရန်လည်း ရည်ရွယ်သည်။

ယူနန်ပြည်နယ်အရာရှိများသည် မြန်မာနိုင်ငံကိုကြားခံထားကာ ၎င်းတို့၏ပြည်နယ်အား အရှေ့တောင်အာရှနှင့် တောင်အာရှနိုင်ငံများကို ဆက်သွယ်နိုင်မည်ဟု ရည်မှန်းထားသည်။ ယူနန်ပြည်နယ်အား တရုတ်နိုင်ငံအနောက်ပိုင်းပြည်နယ်များထဲတွင် ကုန်ထုတ်လုပ်ငန်း၌ အဓိကကျသော ဗဟိုချက်ဖြစ်လာရန် နယ်စပ်စီးပွားရေးပူးပေါင်းဆောင်ရွက်မှု ဇုန်စီမံကိန်းများကို အမြန်ဆုံးဆောင်ရွက်ရန် တွန်းအားပေးလေ့ရှိသည်။ ထို့ကြောင့် ၎င်းအစီအမံအား “ယူနန်ပြည်နယ်ကို ဗဟိုပြုသော အစီအမံသစ်” (၂၀၁၆-၂၀၂၀) မဟာဗျုဟာစီမံကိန်းထဲတွင် ထည့်သွင်းကာ ယူနန်ပြည်နယ်နှင့်ဆက်စပ်နေသော အိမ်နီးချင်းနိုင်ငံများ၏နယ်စပ်ဒေသများတွင် စက်မှုဇုန်များ တည်ဆောက်ရန် အစီအမံများရေးဆွဲထားသည်။

တရုတ်သမ္မတရှီကျင့်ဖျင်၏ မြန်မာနိုင်ငံခရီးစဉ်(ဇန်နဝါရီလ ၂၀၂၀ ခုနှစ်)အတွင်းတွင် တရုတ်-မြန်မာ နှစ်နိုင်ငံနယ်စပ်စီးပွားရေး ပူးပေါင်းဆောင်ရွက်မှုဇုန်စီမံကိန်းများသည် တရုတ်-မြန်မာ စီးပွားရေးစင်္ကြံတွင် အဓိကကျသော မဏ္ဍိုင်တခုဖြစ်ကြောင်း သမ္မတရှီကျင့်ဖျင်က ထုတ်ဖော်ပြောဆိုခဲ့သည်။ ၎င်း၏ ခရီးစဉ်တွင် ရွှေလီ-မူဆယ် နယ်စပ်စီးပွားရေးပူပေါင်းမှုဇုန် တည်ဆောက်ရေး မူဘောင်သဘောတူညီမှုစာချုပ် ရေးထိုးနိုင်ရန် နှစ်နိုင်ငံကြား ပူးပေါင်းညှိနှိုင်း ဆောင်ရွက်မှု အလျင်အမြန်တိုးတက်လာစေရေး နားလည်မှုစာချွန်လွှာကို လက်မှတ်ရေးထိုးခဲ့သည်။

နယ်စပ်စီးပွားရေးပူးပေါင်းဆောင်ရွက်မှုဇုန်စီမံကိန်း သုံးခု

နယ်စပ်စီးပွားရေးပူးပေါင်းဆောင်ရွက်မှုဇုန်စီမံကိန်း သုံးခုကို မြန်မာနိုင်ငံဘက်ခြမ်းတွင် ရှမ်းပြည်နယ်အတွင်းရှိ မူဆယ်မြို့နယ် နှင့် ကိုးကန့်ကိုယ်ပိုင်အုပ်ချုပ်ခွင့်ရဒေသရှိ ချင်းရွှေဟော်မြို့နယ်၊ ကချင်ပြည်နယ် အထူးဒေသ(၁)ရှိ ကန်ပိုက်တီမြို့နယ် များတွင် အကောင်အထည်ဖော်ရန် မြန်မာ-တရုတ် နှစ်နိုင်ငံအကြား သဘောတူညီထားသည်။ အထူးသဖြင့် အထက်ပါဇုန်သုံးခု ထဲမှ နှစ်နိုင်ငံ နယ်စပ်ကုန်သွယ်ရေးတွင်အဓိကျသော မူဆယ်မြို့နယ်ရှိ ဇုန်စီမံကိန်းကို ဦးစားပေး တည်ဆောက်ရန် သဘောတူညီထားသည်။

မူဆယ်-ရွှေလီ နယ်စပ်စီးပွားရေးပူးပေါင်းဆောင်ရွက်မှုဇုန်

မူဆယ်(ဟိုဆောင်)-ရွှေလီ(ကျယ်ဂေါင်) နယ်စပ်စီးပွားရေးပူးပေါင်းဆောင်ရွက်မှုဇုန်တွင် နိုင်ငံတကာစီးပွားရေးပင်မဇုန်(Core Zone)၊ ပို့ကုန်ထုတ်လုပ်မှုဇုန်၊ သွင်းကုန်ထုတ်လုပ်မှုဇုန်နှင့် ကုန်လှောင်ရုံဇုန်များ တည်ဆောက်မည်ဖြစ်သည်။ တရုတ်-မြန်မာ နယ်စပ်စီးပွားရေးပူးပေါင်းဆောင်ရွက်မှုဇုန် စီမံကိန်းများ၏ ပင်မဇုန်များကို နှစ်နိုင်ငံနယ်နိမိတ် နှစ်ခုကြား ခွလျက် တည်ဆောက်ရန်သဘောတူထားသည်။ အထူးသဖြင့် ပင်မဇုန်များမှ ဝင်ထွက်ရောင်းချသော ကုန်ပစ္စည်းများသည် အခွန်အထူးသက်သာခွင့်များ ရရှိမည်ဖြစ်သည်။

မူဆယ်-ရွှေလီ နိုင်ငံတကာစီးပွားရေးပင်မဇုန် တည်နေရာအား ရှမ်းပြည်နယ်မြောက်ပိုင်း၊ မူဆယ်မြို့နယ်၊ ဟိုဆောင်ရွာနှင့် ယူနန်ပြည်နယ်ဘက်ခြမ်း၊ တတ်ဟုန်ပြည်နယ်ခွဲရှိ ကျယ်ဂေါင်ဇုန်တို့ကို ချိတ်ဆက်ရန် ပြင်ဆင်ထားသည်။ ကြူကုတ်(ပန်ဆိုင်း)(မြန်မာ)နှင့် ဝမ်တိန်(တရုတ်)၊ ကျင်းစမ်းကျော့(မြန်မာ)နှင့် မက်မန့်(တရုတ်) တို့တွင်လည်း ပို့ကုန်ထုတ်လုပ်မှုဇုန်နှင့် ကုန်လှောင်ရုံဇုန်များ တည်ဆောက်ရန် ပြင်ဆင်ထားသည်။ ထို့အပြင် မန်ဟီရိုး(မြန်မာ)- Jiexiang(တရုတ်)နှင့် နန့်ခမ်း(မြန်မာ)-နောင်တောင်း Nongdao (Nongdaozhen)(တရုတ်) တို့တွင် သွင်းကုန်ထုတ်လုပ်မှုဇုန်နှင့် ကုန်လှောင်ရုံဇုန်များ တည်ဆောက်ရန် ပြင်ဆင်ထားသည်။ ထိုဇုန်များ ချိတ်ဆက်သွားလာနိုင်ရန်အတွက် အဓိကလမ်းမကြီးများကို အဆင့်မြှင့်တင်ရန်နှင့် လမ်းသစ်များ ဖောက်လုပ်ရန်လည်း စီမံထားသည်။

ကြူကုတ်(ပန်ဆိုင်း)၊ နန့်ခမ်း၊ မန့်ဟီးရိုးဒေသရှိ နယ်စပ်ပူးပေါင်းရေးဇုန်များ၏ မြေနေရာများသည် လက်နက်ကိုင်များ၏ လူပ်ရှားရာ ဒေသများဖြစ်သည့်အပြင် ပဋိပက္ခများကြောင့် ယခုကာလအထိ မြန်မာအစိုးရဘက်က တရားဝင်အတည်ပြုပေးနိုင်ခြင်းမရှိသေးပေ။

ယူနန်ပြည်နယ်ဘက်ခြမ်းရှိ နိုင်ငံတကာစီးပွားရေးပင်မဇုန် တည်ဆောက်ရန် လျာထားသောနေရာများ အားလုံးနီးပါးတွင် စက်မှုဇုန်များ၊ ကုန်လှောင်ရုံများ၊ လိုအပ်သောအခြေခံအဆောက်အအုံများမှာ တည်ဆောက်ပြီးစီးနေပြီ ဖြစ်သည်။ နယ်စပ်စီးပွားရေးပူးပေါင်းဆောင်ရွက်မှုဇုန်စီမံကိန်းနှင့် ပတ်သက်၍ စီမံကိန်းရှယ်ယာခွဲဝေမှုနှင့် စီမံခန့်ခွဲမှုများ အသေးစိတ်ပါဝင်သော စီမံကိန်းအကောင်အထည်ဖော်ရေးမူဘောင်ကို မြန်မာနိုင်ငံဘက်မှ လက်မှတ်ရေးထိုးရန် ပြင်ဆင်နေသည်။ နယ်စပ်စီးပွားရေးပူးပေါင်းဆောင်ရွက်မှုဇုန် တည်ဆောက်ရေးအတွက် နှစ်နိုင်ငံအကြား ဗဟိုကော်မတီကို ဖွဲ့စည်းထားသည့်အပြင် ဒေသအဆင့်လုပ်ငန်းအဖွဲ့ကိုလည်း ဖွဲ့စည်းထားပြီး အသေးစိတ်ဆွေးနွေးမှုများ ပြုလုပ်နေသည်။

၂၀၂၀ ပြည့်နှစ်၊ ဒီဇင်ဘာ ၁၇ ရက်တွင် ကျင်းပခဲ့သော မြန်မာ-တရုတ်နယ်စပ်စီးပွားရေးပူးပေါင်းဆောင်ရွက်မှုဇုန် တည်ထောင်အကောင်အထည်ဖော်ရေးဆိုင်ရာ ဗဟိုကော်မတီ(ဆဋ္ဌမအကြိမ်) လုပ်ငန်းညှိနှိုင်းအစည်းအဝေး ဆုံးဖြတ်ချက်အရ မူဆယ်ရှိ နိုင်ငံတကာစီးပွားရေးပင်မဇုန်(Core Zone) နှင့် ကျင်းစမ်းကျော့ရှိ ပို့ကုန်ထုတ်လုပ်မှုဇုန်နှင့် ကုန်လှောင်ရုံဇုန်ကိုသာ စီမံကိန်းအကောင်အထည်ဖော်ရန် လျာထားခဲ့သည်။ မူလက အထက်ပါစီမံကိန်းများနှင့် တပါတည်းတည်ဆောက်ရန်အဆိုပြုခဲ့သော ကြူကုတ်(ပန်ဆိုင်း)ရှိ ပို့ကုန်ထုတ်လုပ်မှုဇုန်နှင့် ကုန်လှောင်ရုံဇုန် စီမံကိန်းကိုမူ တရုတ်နိုင်ငံက လျာထားချက်မှ ပြန်လည်ပယ်ဖျက်ခဲ့သည်။ 

နှစ်နိုင်ငံ နောက်ဆုံးသဘောတူညီချက်အရ မူဆယ်တွင် နိုင်ငံတကာစီးပွားရေးပင်မဇုန်(Core Zone)နှင့် ကျင်းစမ်းကျော့တွင် ပို့ကုန်ထုတ်လုပ်မှုဇုန်နှင့် ကုန်လှောင်ရုံဇုန်များကို ဦးစွာအကောင်အထည်ဖော်ရန် ဆုံးဖြတ်ထားသည်။ မူဆယ် ပင်မဇုန်စီမံကိန်းကို မူဆယ်(ဟိုဆောင်)-ရွှေလီ(ကျယ်ဂေါင်) ရှိ မြေ ၅ ဒသမ ၆၃ စတုရန်းကီလိုမီတာတွင် တည်ဆောက်မည်ဖြစ်သည်။ အလားတူ ကျင်းစမ်းကျော့(မြန်မာ)နှင့် မက်မန့်(တရုတ်) ရှိ မြေအကျယ် အဝန်း ၂ ဒသမ ၈၂ စတုရန်းကီလိုမီတာတွင် ပို့ကုန်ထုတ်လုပ်မှုဇုန်နှင့် ကုန်လှောင်ရုံဇုန်များကို တည်ဆောက်မည်ဖြစ်သည်။ မူဆယ်ဇုန်နှင့် ကျင်းစမ်းကျော့ဇုန်တို့ အကျိုးအမြတ်ဖြစ်ထွန်းကာ စီးပွားရေးအရ တွက်ချေကိုက်မှုရှိမှသာ ကျန်ဇုန်များကို ဆက်လက်အကောင်အထည်ဖော်ရန် သဘောတူညီထားသည်။

တရုတ်-မြန်မာစီးပွားရေးစင်္ကြံ(CMEC) စီမံကိန်းအောက်တွင် ကူးသန်းရောင်းဝယ်ရေး၊ သယ်ယူပို့ဆောင်ရေး စသည့် ကဏ္ဍများကို အထောက်အပံ့ပြုနိုင်မည့် ဆောင်ရွက်ချက်များအတွက် တရုတ်အစိုးရက မြန်မာအစိုးရအား ယွမ် လေးဘီလီယံ ထောက်ပံ့ထားကြောင်း စီးပွားရေးနှင့် ကူးသန်းရောင်းဝယ်ရေးဝန်ကြီးဌာနက ထုတ်ဖော်ပြောကြားခဲ့သည်။

အဆိုပါ ထောက်ပံ့ငွေဖြင့် စီးပွား/ကူးသန်းက မြန်မာ-တရုတ်နယ်စပ်ရှိ မူဆယ်မှ ကျင်စန်းကျော့အထိ ဆက်သွယ်ထားသောလမ်းအား နှစ်လမ်းသွားလမ်းမကြီးအဖြစ် တိုးချဲ့ရန် ၂၀၂၀ ပြည့်နှစ်၊ ဇွန်လကုန်ပိုင်းက ပြည်ထောင်စုအစိုးရအဖွဲ့ စီမံကိန်း၊ ဘဏ္ဍာရေးနှင့် စက်မှုဝန်ကြီးဌာနထံ အဆိုပြုလွှာ တင်ပြထားကြောင်း သိရသည်။

စီမံကိန်း အသေးစိတ်အချက်အလက်များ

အချိန်ကာလပြဇယား

• ၁၉၉၂ ခုနှစ် တွင် မူဆယ်-ရွှေလီ၌ တည်ဆောက်မည့် နယ်စပ်ဖြတ်ကျော်စီးပွားရေးပူးပေါင်း ဆောင်ရွက်မှုဇုန်၌ ပါဝင်မည့် စီမံကိန်းအသေးစိတ်အစီအမံများကို ယူနန်ပြည်နယ်တွင် စတင် ရေးဆွဲခဲ့ကြောင်း မှတ်တမ်းများက ဖော်ပြထားသည်။

• ၂၀၀၇ ခုနှစ် တွင် တရုတ်နိုင်ငံဘက်ခြမ်းမှ တတ်ဟုန်ပြည်နယ်ခွဲသည် အဆိုပါနယ်စပ်ဖြတ်ကျော်စီးပွားရေးပူးပေါင်း ဆောင်ရွက်မှုဇုန်စီမံကိန်းအစီအမံကို မြန်မာအစိုးရဘက်ကို စတင်တင်ပြခဲ့သည်။ သို့သော် စစ်အစိုးရက အကောင်အထည်ဖော်ရန် စိတ်ဝင်ခဲ့ခြင်းမရှိခဲ့ပါ။

• ၂၀၁၆ ခုနှစ် အမျိုးသားဒီမိုကရေစီအဖွဲ့ချုပ်အစိုးရ အာဏာရရှိလာပြီးနောက်တွင် တတ်ဟုန်ပြည်နယ်ခွဲမှ တာဝန်ရှိသူများသည် စီမံကိန်းအကောင်အထည်ဖော်မှုကို အာရုံစိုက်ရန် မြန်မာကူးသန်းရောင်းဝယ်ရေးဝန်ကြီးဌာနအား တွန်းအားပေးခဲ့သည်။

• ၂၀၁၆ ခုနှစ် သြဂုတ်လ က သွားရောက်ခဲ့သော ဒေါ်အောင်ဆန်းစုကြည်၏ တရုတ်နိုင်ငံ ခရီးစဉ်အတွင်းတွင် နှစ်နိုင်ငံအကြား နယ်စပ်စီးပွားရေးပူးပေါင်းဆောင်ရွက်မှုဇုန်များ တည်ဆောက်ရန် သဘောတူညီခဲ့သည်။

• ၂၀၁၇ ခုနှစ် မေလတွင် ပထမဆုံးအကြိမ်ကျင်းပသော ခါးပတ်တကွင်းလမ်းတစင်း(BRI) ဖိုရမ်တွင် နယ်စပ်စီးပွားရေးဇုန်များ အကောင်အထည်ဖော်ရန် နားလည်မှုစာချွန်လွှာကို လက်မှတ်ရေးထိုးခဲ့သည်။

• ၂၀၁၈ ခုနှစ် ဧပြီလတွင် ယူနန်ပြည်နယ်အစိုးရမှတဆင့် တတ်ဟုန်ပြည်နယ်ခွဲက မြန်မာအရာရှိများကို ရှင်ကျန်း(တရုတ်-ကာဇက်စတန်)[Xinjiang(China-Kazakhstan)] နယ်စပ်စီးပွားရေးပူးပေါင်း ဆောင်ရွက်မှုဇုန်သို့ လည်ပတ်ရန်ဖိတ်ကြားခဲ့သည်။ ခရီးစဉ်အပြီးတွင် ရွှေလီ-မူဆယ်စီမံကိန်းကို အကောင်အထည်ဖော်ရန် နှစ်နိုင်ငံမြေနေရာ ရွေးချယ်ခြင်း၊ ဆောက်လုပ်ရေးလုပ်ငန်းများ လုပ်ဆောင်ခြင်းနှင့်ပတ်သက်သော လုပ်ထုံးလုပ်နည်းများကို အကြမ်းဖျင်းအားဖြင့် သဘောတူညီမှု ရရှိခဲ့သည်။

• ၂၀၁၈ ခုနှစ် ဇူလိုင်လတွင် မြန်မာ-တရုတ် နယ်စပ်စီးပွားရေးပူးပေါင်းဆောင်ရွက်မှုဇုန် အကောင်အထည်ဖော်ရေး ဗဟိုကော်မတီကို မြန်မာအစိုးရဘက်က ဖွဲ့စည်းခဲ့သည်။ အဆိုပါ ကော်မတီသည် တရုတ်-မြန်မာ စီးပွားရေးစင်္ကြံ ခေါင်းစဉ်အောက်တွင် အစောဆုံးဖွဲ့စည်းခဲ့သော ကော်မတီဖြစ်ပြီး နှစ်နိုင်ငံအကြား စီးပွားရေးစင်္ကြံ နားလည်မှုစာချွန်လွှာ မရေးထိုးမီ ဖွဲ့စည်းခဲ့သော ကော်မတီလည်း ဖြစ်သည်။

• ဗဟိုကော်မတီဥက္ကဋ္ဌအဖြစ် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန ပြည်ထောင်စုဝန်ကြီး ဒေါက်တာသန်းမြင့်က တာဝန်ယူခဲ့ပြီး ဒုတိယဥက္ကဋ္ဌများအဖြစ် နယ်စပ်စီးပွာရေးဇုန်များ တည်ဆောက်ရန်လျာထားသော ပြည်နယ်နှစ်ခုမှ ဝန်ကြီးချုပ်များဖြစ်သော ရှမ်းပြည်နယ်ဝန်ကြီးချုပ် ဒေါက်တာလင်းထွဋ်၊ ကချင်ပြည်နယ်ဝန်ကြီးချုပ်ဒေါက်တာခက်အောင် နှင့် ကိုးကန့် ကိုယ်ပိုင်အုပ်ချုပ်ခွင့်ရဒေသ ဥက္ကဋ္ဌ ဦးကျောက်တယ်ချန်တို့က တာဝန်ယူခဲ့သည်။ ဗဟိုကော်မတီ၏ အတွင်းရေးမှူးအဖြစ် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန ဒုတိယဝန်ကြီး ဦးအောင်ထူးက တာဝန်ယူပြီး တွဲဖက်အတွင်းရေးမှူးအဖြစ် ကုန်သွယ်ရေးဦးစီးဌာန၏ ညွှန်ကြားရေးမှူးချုပ် ဦးရန်နိုင်ထွန်းက တာဝန်ယူထားသည်။

• ၂၀၁၈ ခုနှစ် ဇူလိုင်လ ၁၂ ရက် တွင် မြန်မာ-တရုတ် နယ်စပ်စီးပွားရေးပူးပေါင်းဆောင်ရွက်မှုဇုန်များ ဗဟိုကော်မတီ၏ ပထမအကြိမ် အကောင်အထည်ဖော်ရေး အစည်းအဝေးကို ကျင်းပခဲ့ပြီး ကချင်ပြည်နယ်နှင့် ရှမ်းပြည်နယ်တို့တွင် တည်ဆောက်သွားမည့် ဇုန်သုံးခု၏ တည်နေရာများကို အကြမ်းဖျင်းအတည်ပြုခဲ့သည်။

• မြန်မာ-တရုတ် နယ်စပ်စီးပွားရေးပူးပေါင်းဆောင်ရွက်မှုဇုန်များ ဗဟိုကော်မတီ၏ ဒုတိယအကြိမ်အစည်းအဝေးကို ၂၀၁၉ ခုနှစ် မေလ ၂၈ ရက်နေ့တွင် နေပြည်တော်တွင် ကျင်းပခဲ့သည်။ တတိယအကြိမ်အစည်းအဝေးကို ၂၀၁၉ ခုနှစ် ဇူလိုင်လ ၂၆ ရက်၌  တောင်ကြီးမြို့တွင် ကျင်းပခဲ့ပြီး စတုတ္တအကြိမ်အစည်းအဝေးကို ၂၀၁၉ ခုနှစ် အောက်တိုဘာလ ၅ ရက်၌ ကချင်ပြည်နယ်တွင် ကျင်းပခဲ့သည်။

• ၂၀၁၉ ခုနှစ်  သြဂုတ်လတွင် မြန်မာနိုင်ငံမှ မူဆယ်-ရွှေလီ နယ်စပ်စီးပွားရေးပူးပေါင်း ဆောင်ရွက်မှုဇုန် နှင့်ပတ်သတ်၍ မူဘောင်လက်မှတ်ထိုးရေး စာချုပ်မူကြမ်းကို မြန်မာအရာရှိများ၏ မှတ်ချက်များဖြင့် တရုတ်နိုင်ငံဘက်ကို ပေးပို့ထားခဲ့သည်။ ထိုမူကြမ်းတွင် စီမံကိန်းတည်ဆောက်ရေးအတွက် နှစ်နိုင်ငံအကြားကော်မတီများ ဖွဲ့စည်းရေး၊ ဇုန်များကိုစီမံမှု၊ ရင်းနှီးမြှုပ်နှံသူများကို ပေးအပ်မည့် အခွင့်အလမ်းများ အသေးစိတ်ပါဝင်သည်။

• ၂၀၂၀ ခုနှစ် ဖေဖော်ဝါရီလတွင် မြန်မာဘက်မှ တရုတ်နိုင်ငံနှင့် ပူးတွဲကော်မတီတရပ်ဖွဲ့စည်းရန် ပါဝင်မည့်ကိုယ်စားလှယ်စာရင်းကိုပေးပို့ခဲ့သည်။ မူဆယ်-ရွှေလီ နယ်စပ်စီးပွားရေးပူးပေါင်း ဆောင်ရွက်မှုဇုန်စီမံကိန်း မူဘောင်လက်မှတ်ရေးထိုးရန် အတွက်ဆွေးနွေးမှုမှာ ကိုဗစ်-၁၉ ကပ်ရောဂါကြောင့် ခေတ္တရပ်တန့်သွားသည်။

• ၂၀၂၀ ဇွန်လ ၁၂ ရက်နေ့တွင် ရွှေလီ-မူဆယ် နယ်စပ်စီးပွားရေးပူးပေါင်းဆောင်ရွက်မှုဇုန် တည်ဆောက်ရေးအတွက် နှစ်နိုင်ငံဒေသအဆင့်လုပ်ငန်းအဖွဲ့၏ ပထမဆုံးအကြိမ် အစည်းအဝေးကို အွန်လိုင်းမှတဆင့် ကျင်းပခဲ့သည်။ အစည်းအဝေးရလဒ်များကိုမူ တရားဝင်ကြေညာခြင်းမရှိခဲ့ပေ။

လူမှုသဘာ၀၀န်းကျင်အပေါ် သက်ရောက်မှု လေ့လာဆန်းစစ်မှုများ

လက်ရှိအချိန်ထိ အထက်ပါ စီမံကိန်း သုံးခုအတွက် သဘာဝပတ်ဝန်းကျင်ထိခိုက်မှု လေ့လာဆန်းစစ်မှုစစ်တမ်း၊ လူမှု့ဘ၀ ထိခိုက်မှုလေ့လာဆန်းစစ်မှုစစ်တမ်းများကို ပြုလုပ်ထားခြင်း မရှိသေးပါ။

လူထုတုံ့ပြန်မှု

မူဆယ်မြို့နယ်တွင် တည်ဆောက်မည့် စီးပွားရေးဇုန်များနှင့်ပတ်သတ်ပြီး မြေယာရှင်းလင်းသိမ်းယူခြင်းများ ပြုလုပ်မည် ဖြစ်ကြောင်း အစိုးရဘက်မှ ပြောဆိုထားသည်။ လက်ရှိအချိန်ထိ သိမ်းယူမည့်မြေဧရိယာ မည်မျှပါဝင်မည်ကို အတိအကျ ကြေညာခြင်း မရှိသောကြောင့် ဒေသခံပြည်သူများမှာ ၎င်းတို့၏မြေယာများ သိမ်းဆည်းခံရမည်ကို စိုးရိမ်ပူပန်နေကြသည်။ အထူးသဖြင့် စီမံကိန်း အကောင်အထည်ဖော်မည့်လမ်းကြောင်းသည် ရှမ်းပြည်နယ်မြောက်ပိုင်းရှိ လက်နက်ကိုင်များ ခြေကုပ်ယူထားရာ နေရာများဖြစ်သဖြင့် စီမံကိန်းကြောင့်စစ်ပွဲများ ပိုမိုပြင်းထန်လာမည်ကို စိုးရိမ်ရကြောင်း ဒေသခံများက ပြောဆိုထားသည်။

သမ္မတရှီကျင့်ဖျင်၏ မြန်မာနိုင်ငံခရီးစဉ်အတွင်း ရှမ်းတိုင်းရင်းသားများဒီမိုကရေစီအဖွဲ့ချုပ်က ထုတ်ပြန်ထားသော ကြေညာချက်တွင် မူဆယ်နှင့်ချင်းရွှေဟော်ဒေသရှိ နယ်စပ်စီးပွားရေးပူးပေါင်းဆောင်ရွက်မှုဇုန် တည်ဆောက်မှုကြောင့် မြေယာသိမ်းဆည်းခံ ရမည့်အရေးကို အများပြည်သူများ စိုးရိမ်နေရကြောင်း ဖော်ပြထားသည်။ ထို့အပြင် နယ်စပ်စီးပွားရေးပူးပေါင်းဆောင်ရွက်မှုဇုန်စီမံကိန်းများတွင် ဒေသခံပြည်သူများနှင့် သက်ဆိုင်ရာဒေသခံ အဖွဲ့အစည်းများ၏ ပါဝင်ခွင့်ကို လျစ်လျူရှုထားခြင်းသည် ပဋိပက္ခများ၊ ပြည်တွင်းစစ်မီးကို ပိုမိုတောက်လောက်စေနိုင်သည်ဟု သတိပေးထားသည်။

Reference:

Govt Approves Sites For 3 New Economic Zones Along China Border

Invest in Yunnan 园区聚焦

Chinese Ministry of Commerce and Ministry of Commerce of Myanmar Sign the MOU of Building China-Myanmar Border Economic Cooperation Zone

Myanmar, China Sign Dozens of Deals on BRI Projects, Cooperation During Xi’s Visit

Writing a New Chapter in Our Millennia-Old Pauk-Phaw Friendship

Kachin State Approves Chinese-Backed Business Park in Border Town

Kachin State Inks Border Business Park Deal With China-Myanmar Joint Venture

China-Myanmar (Ruili-Muse) Border Economic Cooperation Zone passed Expert Panel Review

Myanmar Set to Ink Pact with China on Border Cooperation Zones

Popular Shan Party Warns Chinese Projects Without Local Consent Risk More Conflicts