တရုတ်-မြန်မာဆက်ဆံရေး တပတ်တာ သတင်းအနှစ်ချုပ် နိုဝင်ဘာ ပထမပတ် (အောက်တိုဘာ ၃၁ ရက်မှ နိုဝင်ဘာ ၆ ရက်အထိ)

ယခုရက်သတ္တပတ်အတွင်း တရုတ်-မြန်မာဆက်ဆံရေးနှင့် သက်ဆိုင်သော ပြည်တွင်းပြည်ပ သတင်းနှင့် သုံးသပ်ချက်ပေါင်း ၈၀ နီးပါးကို ISP-Myanmar China Desk က စုစည်းခဲ့ပါသည်။ တပတ်တာအတွင်း ပေါ်ပေါက်ခဲ့သော သတင်းများမှ အလေးပေးအာရုံစိုက်သင့်သော ဖြစ်ရပ်များနှင့် အခြားသတင်း စုစည်းမှုများကို ISP-Myanmar China Desk မှ အနှစ်ချုပ် ဖော်ပြပေးမည် ဖြစ်ပါသည်။

နိုင်ငံတကာသတင်းစာမျက်နှာများပေါ်မှ မြန်မာနိုင်ငံနှင့်ဆက်စပ်သောတရုတ် သတင်းများ

ယခုရက်သတ္တပတ်အတွင်း နိုင်ငံတကာသတင်းစာများတွင် မြန်မာနိုင်ငံ၏ အထွေထွေရွေးကောက်ပွဲသတင်းများက ကြီးစိုးနေသော်လည်း အိန္ဒိယသမုဒ္ဒရာထွက်ပေါက် ပထဝီနိုင်ငံရေးဆိုင်ရာသတင်းများကလည်း နိုင်ငံတကာသတင်းမျက်နှာစာတွင်သာမက မြန်မာပြည်တွင်းသတင်းဌာနများတွင်ပါ အလေးပေးဖော်ပြလာခဲ့သည်။ ယခင် အောက်တိုဘာ စတုတ္ထပတ် သတင်းအနှစ်ချုပ်တွင် အိန္ဒိယ သတင်းဌာနများ၏ မြန်မာနိုင်ငံနှင့် သက်ဆိုင်သော ပထဝီနိုင်ငံရေးဆိုင်ရာ အခင်းအကျင်းများကို ဖော်ပြခဲ့ပြီး ဖြစ်ပါသည်။ နိုင်ငံတကာသတင်းစာမျက်နှာများပေါ်မှ မြန်မာနိုင်ငံနှင့်ဆက်စပ်သောတရုတ် သတင်းများတွင် တရုတ်နိုင်ငံမှ မြန်မာနိုင်ငံသို့ ကိုဗစ်-၁၉ ကာကွယ်၊ထိန်းချုပ်၊ ကုသရေးအတွက် အထောက်အပံ့ပစ္စည်းများ လှူဒါန်းမှုသတင်းများ၊ လန်ချန်း-မဲခေါင်နှင့်ဆက်စပ်သော သတင်းများအပြင် အိန္ဒိယသမုဒ္ဒရာထွက်ပေါက် ပထဝီနိုင်ငံရေးဆိုင်ရာသတင်းများကို အများအပြား ပိုမိုတွေ့မြင်လာရသည်။ အိန္ဒိယသတင်းစာများတွင် ကုလားတန်စီမံကိန်းရှေ့ဆက်မရမှုများ၊ ရခိုင်ဒေသရှိ တိုက်ပွဲများအပြင် ယူနန်ပြည်နယ်တွင် အခြေစိုက်နေထိုင်နေသည့် နာဂဒေသရှိ လက်နက်ကိုင်အဖွဲ့များ အကြောင်း၊ ကျောက်ဖြူရှိ တရုတ်စီမံကိန်းများသည် အကြွေးထောက်ချောက်တခုဖြစ်လာမည်ကို စိုးရိမ်သင့်ကြောင်း အိန္ဒိယသတင်းဌာန Hindustan Times ကရေးသားဖော်ပြခဲ့သည်။ အဆိုပါ သတင်းနှင့် ခေါင်းစဉ်တူနှင့် ကျောရိုးတူ သတင်းများကို အိန္ဒိယသတင်းဌာနအများအပြားနှင့် အနောက်တိုင်းသတင်းဌာနအချို့ တွင်လည်း ဖော်ပြခဲ့ပြီး မြန်မာနိုင်ငံနှင့် ကိုဗစ်-၁၉ ကပ်ရောဂါ ကာကွယ်ဆေးသံခင်းတမန်ခင်းသတင်းများကိုပါ ဖော်ပြခဲ့သည်။ မြန်မာပြည်တွင်း သတင်းဌာနတခုဖြစ်သော ဧရာ၀တီသတင်းဌာနကလည်း “ကုလားတန်စီမံကိန်းကို ပစ်မှတ်ထားတဲ့ နောက်ကွယ်မှာ တရုတ်လက်ပါနေဟု အိန္ဒိယ သတင်းစာဖော်ပြ” ၊ “အိန္ဒိယသူပုန်များကို ကူညီရန် တရုတ်ခြိမ်းခြောက်မှု နောက်ကွယ်” ဟူသော သတင်းများကို ပြန်လည်ဖော်ပြရေးသားခဲ့သည်။ ထိုသို့ တရုတ်နိုင်ငံနှင့်အိန္ဒိယနိုင်ငံတို့၏ အာရှအင်အားပြိုင်ဆိုင်မှုနှင့် နယ်စပ်တင်းမာမှုအလွန် လေလှိုင်းမီဒီယာတိုက်ပွဲများအကြားတွင် မြန်မာ့အရေးကိစ္စများကိုလည်း ထည့်သွင်းဖော်ပြကာ ရေးသားဖော်ပြနေမှုများသည် ပထဝီနိုင်ငံရေးအကျိုးဆက်များ ဖြစ်ပေါ်လာနိုင်ရာ  မြန်မာနိုင်ငံ အနေဖြင့်အလေးထားစောင့်ကြည့်သင့်ပါသည်။

တရုတ်ကုမ္ပဏီများ ဝင်ရောက်ယှဉ်ပြိုင်ထားသော ရန်ကုန်မိုးပျံရထားလမ်း စီမံကိန်း

ရန်ကုန်မြို့၏ ယာဉ်ကြောကျပ်တည်းမှုကို ဖြေရှင်းနိုင်ရန် မိုးပျံရထားလမ်းစီမံကိန်းကို ရန်ကုန်မြို့အရှေ့နှင့် အနောက်ကို ဆက်သွယ်မည့် လမ်းကြောင်း (၂) အတွက် တိုးကြောင်ကလေး(ဒဂုံမြို့သစ်တောင်ပိုင်း)မှ လှိုင်သာယာအထိ ဘူတာပေါင်း ၂၄ ခု ကို  တည်ဆောက်မည်ဟု ပို့ဆောင်ရေးနှင့် ဆက်သွယ်ရေးဝန်ကြီးဌာနက ပြောကြားထားသည်။ အဆိုပါ မိုးပျံရထားလမ်းစီမံကိန်းကို ဂျပန်နိုင်ငံ JICA မှ စီမံကိန်းဖော်ဆောင်ရန်အဓိကထား ဦးဆောင်နေသော်လည်း စီမံကိန်းတည်ဆောက်ရေးလုပ်ငန်းများတွင် တရုတ်နိုင်ငံမှ ကုမ္ပဏီများအပြင် အခြားပြည်တွင်းပြည်ပ ကုမ္ပဏီများလည်း ပါဝင်ရန် အဆိုပြုထားကြသည်။ လမ်းကြောင်း (၂) အတွက် စီမံကိန်း ပထမအဆင့်အနေဖြင့် လှိုင်သာယာမှ ပါရမီအထိ ဦးစားပေး တည်ဆောက်နိုင်ရန် ဂျပန်ကုမ္ပဏီတခုနှင့် အသေးစိတ်ညှိနှိုင်းနေပြီး ၂၀၂၁-၂၀၂၂ ဘဏ္ဍာနှစ်တွင် စတင်နိုင်ရန် လျာထားကြောင်းသိရသည်။ ထို့အပြင် လမ်းကြောင်း (၂)  စီမံကိန်းများ ပြီးစီးပါက ရန်ကုန်မြို့တောင်နှင့် မြောက်ကို ဆက်သွယ်မည့် လမ်းကြောင်း (၁) အတွက် ဒလမှ မင်္ဂလာဒုံ အထိ ဘူတာပေါင်း ၂၂ ခု ကို  တည်ဆောက်မည်ဟု ဆိုသည်။ ရန်ကုန်မိုးပျံရထား လမ်းကြောင်း (၁)၏ အစိတ်အပိုင်းတခုဖြစ်သော ကြည့်မြင်တိုင်မှ မင်္ဂလာဒုံ ၊ မင်္ဂလာဒုံမှ မြောက်ဥက္ကလာ လမ်းပိုင်းကို China Railway Eryuan Engineering Group Co., Ltd.(CREEC) မှ အမေရိကန်ဒေါ်လာ ၁ ဒသမ ၅ ဘီလီယံ အကုန်အကျခံကာ ရင်းနှီးမြှုပ်နှံရန် အဆိုပြုထားသည်။ CREECသည် ရပ်ဝန်းလမ်းကြောင်းအစီအမံ(BRI) ဦးဆောင်ကော်မတီ၏ ဆုံးဖြတ်ချက်ကို စောင့်ဆိုင်းနေသည်။

(ရန်ကုန်မိုးပျံရထားလမ်းစီမံကိန်းသည် တရုတ်-မြန်မာစီးပွားရေးစင်္ကြံလမ်း၏ အစိတ်အပိုင်းတခုဖြစ်ပါသည်။ မြေပုံတွင် အသေးစိတ်ကြည့်ရှုရန် နှိပ်ပါ။)

မြန်မာ့ရွေးကောက်ပွဲနှင့် တရုတ်

နိုဝင်ဘာ ၈ရက်တွင် ကျင်းပခဲ့သည့် ရွေးကောက်ပွဲ၌ အသုံးပြုခဲ့သော  ကိုဗစ်-၁၉ ကာကွယ်ရေးပစ္စည်းများမှာ တရုတ်နိုင်ငံမှ ဝယ်ယူထားခဲ့ခြင်းဖြစ်ပြီး၊ သယ်ယူပို့ဆောင်စရိတ်အပါအဝင် ယူရို ၂၃ သန်းကျော်ဖိုးကျသင့်ကြောင်း နိုင်ငံတော်သမ္မတရုံး၏ ပြောရေးဆိုခွင့်ရှိသူက ပြောကြားခဲ့ကြောင်း Myanmar Timesသတင်းဌာနတွင် ဖော်ပြခဲ့သည်။ ဝယ်ယူခဲ့သော ပစ္စည်းများတွင် KN95 Mask များ၊ PPE Medical Protective clothing များ၊ Medical Cap များ၊ Goggles များ ပါဝင်ပြီး အောက်တိုဘာ ၁၈ ရက်မှ စတင်၍ နိုဝင်ဘာ ၃ ရက်အထိ ရန်ကုန်နှင့် မန္တလေး လေဆိပ်များသို့ စုစုပေါင်း ၁၁၄ ခေါက်ကျော် ရောက်ရှိပို့ဆောင်ခဲ့ပါသည်။

ထို့အပြင် ရွေးကောက်ပွဲတွင် NLDကို မဲပေးထောက်ခံခြင်းက တရုတ်ထောက်ခံခြင်း ဖြစ်သည်ဟူသော ဆောင်းပါး တပုဒ်ကိုလည်း Asia Times media ကဖော်ပြခဲ့သည်။ NLDသည် ယခင်နှစ်များတွင် တရုတ်လိုလားသော မူဝါဒများကို ကိုင်စွဲထား၍ မြန်မာပြည်တွင်း၌ တရုတ်တို့ လွှမ်းမိုးမှု ကြီးထွားလာပြီး ပြည်နယ်အခြေစိုက် တိုင်းရင်းသားပါတီများကို မဲပေးထောက်ခံခြင်းက အငြင်းပွားဖွယ် တရုတ်စီမံကိန်းများကို လူ့အဖွဲ့အစည်းအောက်ခြေအဆင့်တွင် ဆန့်ကျင်နိုင်ရန် အထောက်အကူပြုလိမ့်မည်ဟု ဖော်ပြထားသည်။

ရွေးကောက်ပွဲနှင့် ဆက်စပ်သော နောက်ထပ် သတင်းတစ်ပုဒ်အနေဖြင့် မူဆယ်မြို့နယ် ပန်ဆိုင်း (ကြူကုတ်) မြို့ ရပ်ကွက် (၃) ရပ်ကွက် အုပ်ချုပ်ရေးမှူးအိမ်၌ မဲရုံဖွင့်လှစ်၍ ကြိုတင်မဲပေးခြင်းလုပ်ငန်းနှင့် မဲပုံထားရှိ သိမ်းဆည်းခြင်းကို SNLD ကိုယ်စားလှယ်လောင်းက ကန့်ကွက်ခဲ့သောကြောင့် မြို့နယ်ရွေးကောက်ပွဲကော်မရှင်က မဲပုံးများအား စာသင်ကျောင်းသို့ ပြောင်းရွှေ့ထားရှိစေခဲ့ကြောင်း Eleven Media Group က ဖော်ပြထားသည်။ မဲရုံထားရှိသော အိမ်သည် စောင့်ကြည့်လေ့လာသူများအတွက် သွားလာရန်ခက်ခဲခြင်း၊ မဲရုံကို စီမံခန့်ခွဲနေသူများနှင့် လာရောက်မဲပေးသူအားလုံးမှာ တရုတ်ဘာသာစကားသာ ပြောဆိုသောကြောင့် နားလည်ရခက်ခဲခြင်း၊ ကြိုတင်မဲပေးခြင်းအပြင် ကိုယ်စားပြုလာရောက်မဲပေးခြင်းများလည်း ရှိနေခြင်းတို့ကြောင့် မြို့နယ်ရွေးကောက်ပွဲကော်မရှင်ရုံးသို့ တိုင်ကြားခဲ့ခြင်းဖြစ်ကြောင်း ဖော်ပြထားသည်။ မြန်မာ့ရွေးကောက်ပွဲကာလအတွင်း မီဒီယာများ၊ အစိုးရမဟုတ်သောအဖွဲ့အစည်းများ(NGOs) များကို အစိုးရမေးလ်လိပ်စာအတုများဖြင့် ဆိုက်ဘာတိုက်ခိုက်မှုများ ရှိခဲ့ပြီး တရုတ်နိုင်ငံမှ ဟက်ကာများ၏ ခြိမ်းခြောက်မှု ဖြစ်သည်ဟု နည်းပညာသတင်းဌာနတခုဖြစ်သော Security Week တွင် ဖော်ပြထားသည်။

အခြား

ယခုဘဏ္ဍာနှစ်အတွင်း မြန်မာ-တရုတ် နှစ်နိုင်ငံ ကုန်သွယ်ရေးတွင် မြန်မာဘက်မှ ကုန်သွယ်ရေးလိုငွေပမာဏမှာ အမေရိကန်ဒေါ်လာ ၁ ဒသမ ၃ ဘီလီယံခန့် ရှိကြောင်း Global New Light of Myanmar သတင်းစာတွင်ဖော်ပြထားသည်။ တရုတ်ဘက်မှ အကောက်ခွန်နှုန်းထားများ မြင့်မားခြင်း၊ ယခုနှစ်တွင် ကိုဗစ်ကပ်ရောဂါကြောင့် နှစ်နိုင်ငံနယ်စပ်ကုန်သွယ်ရေးတွင် တရုတ်ဘက်မှ စည်းမျဉ်းတင်းကျပ်မှုများ များလာခဲ့ခြင်း၊ တရားမဝင် နယ်စပ်ကုန်သွယ်ရေး အရှိန်ကောင်းနေခြင်းတို့ကြောင့် ပင်လယ်ရေကြောင်း ကုန်သွယ်ရေးတွင် သိသိသာသာ ပြောင်းလဲမှုမရှိသော်လည်း နှစ်နိုင်ငံ ကုန်သွယ်ရေးတွင်မူ မြန်မာနိုင်ငံဘက်မှ ကုန်သွယ်ရေးလိုငွေ ပမာဏများခဲ့ကြောင်း ဖော်ပြထားသည်။

တရုတ်နိုင်ငံ ယူနန်ပြည်နယ်ရှိ တယ်ဟုန်ပြည်နယ်ခွဲအစိုးရက မြန်မာနိုင်ငံရှိ တရုတ်-မြန်မာချစ်ကြည်ရေးအသင်း၊ ကုန်သည်များနှင့် စက်မှုလက်မှုလုပ်ငန်းရှင်များ အသင်းအပါအဝင် အဖွဲ့အစည်းအသီးသီးသို့ ကိုဗစ်ရောဂါ ထိန်းချုပ်ကာကွယ်ရေးပစ္စည်းများ လှူဒါန်းခဲ့ကြောင်း တရုတ်သံရုံး၏ လူမှုကွန်ရက်စာမျက်နှာတွင် ဖော်ပြထားသည်။ ထို့အပြင် ရှမ်းပြည်နယ်အစိုးရသို့လည်း တရုတ်ယွမ်ငွေ ငါးသိန်းခန့် တန်ဖိုးရှိ ကိုဗစ်ရောဂါ ကာကွယ်ထိန်းချုပ်ရေး ပစ္စည်းများ လှူဒါန်းခဲ့သည်။

မှုခင်းသတင်းများအရ နိုဝင်ဘာ ၃၀ရက့်တွင် တရုတ်-မြန်မာ မူဆယ်ရှိ ၁၀၅ မိုင် ကုန်သွယ်ရေးဇုန်တွင် မြန်မာကျပ်ငွေ သိန်း၁၀၀၀ကျော် တန်ဖိုးရှိ ထိန်းချုပ်ဓာတုပစ္စည်းများ ဖမ်းဆီးရမိခဲ့ကြောင်း သတင်းဖော်ပြချက်ရှိခဲ့သည်။ အခြားသတင်းများအရ ဆယ်လအတွင်း လူကုန်ကူးမှုပေါင်း ၉၈ခု တိုင်တန်းမှုရှိခဲ့ရာ ကချင်ပြည်နယ်၊ ဧရာဝတီတိုင်းနှင့် ပဲခူးတိုင်းတို့တွင် အများဆုံး ဖြစ်ပွားခဲ့ပြီး လူကုန်ကူးခံရသူ ၁၄၀ကျော်မှာ တရုတ်၊ မလေးရှားနှင့် ထိုင်းနိုင်ငံများသို့ ပို့ဆောင်၍ အဓမ္မ လုပ်အားခိုင်းစေခြင်း၊ ထိန်းမြားလက်ထပ်စေခြင်းနှင့် ပြည့်တန်ဆာပြုစေခြင်းများ ရှိခဲ့သည်ဟု ဖော်ပြထားသည်။