ကိုဗစ်ကာလအတွင်း ကျွဲနွားမှောင်ခိုဈေးကွက် ကျယ်ပြန့်လာ

ကျွဲနွား မှောင်ခိုဈေးကွက်သည် ကိုဗစ်ကာလအတွင်း အဆမတန် ကြီးမားလာပြီး တရုတ်ဝယ်လက် ခြယ်လှယ်သည့် ဈေးကွက် ဖြစ်နေကာ နေ့စဉ်လိုလို တရုတ်နိုင်ငံသို့ တင်ပို့လျက်ရှိသည်ဟု သိရှိရကြောင်း မန္တလေးတိုင်းဒေသကြီး ကျွဲနွား တင်ပို့ရောင်းချသူများအသင်းဥက္ကဋ္ဌ ဦးစိုးနိုင်က မြန်မာတိုင်းမ်သို့ ပြောကြားခဲ့သည်။ လက်ရှိတွင် မူဆယ်ဘက်ကို ကျွဲနွားများ တရားဝင်တင်ပို့ခြင်းအား ယခုအချိန်တွင် မတွေ့ရှိရဘဲ လမ်းကြောင်း ပြောင်းလိုက်ပြီ ဖြစ်သည်ဟု ဆိုသည်။ ဗန်းမော်ခရိုင်ရှိ ထီးချိုင့် ရွှေကူ ဗန်းမော်လမ်းကြောင်းမှ ကျွဲနွားများ တင်ပို့လျက်ရှိကြောင်း ဦးစိုးနိုင်က ဆိုသည်။